Área importante para a conservación das aves

Pato rabilongo no Refuxio de Aves Migratorias de Bear River, en Utah, Estados Unidos. AICA categorizada como A4.

Colonia de mascato do Cabo en Bird Island, Suráfrica. AICA categorizada como A1 e A4.

Pingüín patagón en Punta Tombo, Chubut, Arxentina. AICA categorizada como A1 e A4.

Mascato boreal na illa Bonaventure en Gaspésie, Canadá. AICA categorizada como A4.

As Áreas importantes para a conservación das aves (AICA) ou Áreas importantes para as aves (AIA), tamén moi coñecidas polas súas siglas en inglés IBA (Important Bird Area), son un programa de BirdLife International para a identificación, documentación e conservación de sitios fundamentais para as aves do mundo.

Obxectivo

A iniciativa xurdiu de BirdLife International en 1985 como unha ferramenta máis para as accións de conservación ambiental e co obxectivo de que todas as áreas importantes para a conservación das aves poidan contar, nalgún momento, con algunha forma de protección.

A lista de AICAs é unha ferramenta útil para estudos científicos, para proxectos de conservación e para a avaliación de impactos ambientais sobre a biodiversidade. A información incorpórase a unha base de datos na que se clasifica por continentes, ecorrexións, países, provincias e distritos.

Historia

Na década de 1980 BirdLife International e Wetlands International emprenderon varios estudos en Europa onde identificaron áreas importantes que necesitaban protección. En 1989 publicouse o primeiro inventario de AICAs realizado coa colaboración de catrocentos expertos que recompilaron información de 2444 áreas en 41 países. Un 25 % das áreas identificadas estaban xa protexidas. En 1995 chegouse ao 50 % de protección.

Difundiuse a metodoloxía para identificar os sitios en todos os países membros da rede de BirdLife Internacional e en 2005 xa se identificaran 6733 AICAs en 168 países. En 2013 xa se identificaran no mundo máis de 10 000 áreas.

A figura de AICA tivo un recoñecemento mundial; foi incorporada á lexislación da Unión Europea, en reservas privadas e en proxectos de conservación.

Criterios para definir AICAs

Identifícase un AICA cando no sitio hai presenza de aves indicadoras, definidas segundo as seguintes categorías: (criterio global)

• Categoría A1: Sitio con especies de aves ameazadas.
• Categoría A2: Sitio con especies de aves endémicas (EBAs, Endemic Bird Areas)-.
• Categoría A3: Sitios con aves características de biomas.
• Categoría A4: Sitios que conteñen poboacións de aves congregatorias (colonias de nidificación, especies que se congregan en época de invernada, concentracións de aves migratorias mentres están de paso).

Hai criterios específicos (B) para o Oriente Próximo e para Europa; e para os países da Unión Europea engádense outros criterios (C).

Fases do programa

• Identificación e consulta: Identificación da área e introdución da información na World Bird Database (Base de datos das aves do mundo).
• Designación do sitio: Publicación e difusión do sitio identificado para que aqueles que toman decisións en temas ambientais estean informados. A designación oficial do sitio asígnana as organizacións locais.
• Protección e conservación: Incentivar para a creación de grupos de apoio para o sitio (organizacións, naturalistas ou calquera grupo de persoas), que deberán ser apoiados por organizacións locais e nacionais para desenvolver o plan de xestión.
• Actualización e monitorización: Actualización permanente das bases de datos e a súa publicación, coa achega de información dos grupos de apoio, os cales estarán a cargo dos labores de monitorización periódica.

Véxase tamén

Ligazóns externas

• Important Bird Areas (IBAs) - BirdLife International (en inglés)
• IBAs en España SEO/Birdlife (en castelán)