Xogos Florais da Coruña

Na Galipedia, a Wikipedia en galego.


Os Xogos Florais da Coruña tiveron lugar o 2 de xullo de 1861 na Coruña, organizados por Juana de Vega (condesa de Espoz e Mina) e Benito Vicetto seguindo o exemplo dos Jocs Florals que se celebraran en Cataluña en 1859 a imitación dos occitanos. Foron os primeiros Xogos Florais celebrados na Galiza contemporánea.

Só unha das composicións premiadas estaba en galego, A Galicia de Francisco Añón. Francisco María de la Iglesia foi o encargado de ler a memoria, que aínda que en castelán, defende afervoadamente o uso do galego.

Os traballos que se presentaron (xunto con outras obras de poetas galegos) publicáronse en 1862 grazas ás achegas económicas de Pascual López Cortón no libro Álbum de la Caridad, que supuxo o comezo do verdadeiro renacemento da literatura galega. Entre as obras presentadas estaba o poema "A campana d'Anllóns" de Eduardo Pondal.