Xefe Powhatan

Na Galipedia, a Wikipedia en galego.
O rei dos powhatan Wahunsonacock (debuxado por John Smith (1612)

Xefe Powhatan ou Wahunsonacock (¿1547? - 1618) foi un líder dos powhatan, principal etnia da confederación de tribos que se estendía dende a actual cidade de Washington D. C. ata Carolina do Norte nos Estados Unidos. Rexía sobre uns 30 pobos, e gobernaba dende a poboación de Werowocomoco localizada no actual condado de Gloucester, Virxinia.

Segundo John Smith, en 1607 subxugou ás tribos do lugar e converteuse no seu xefe. Mantivo unha actitude ambigua cos colonos brancos, mais permitiu que no ano 1613, a súa filla Pocahontas casase con John Rolfe. Morreu no 1618 e foi sucedido polo seu irmán Opitchapan. Converteuse nun personaxe lendario para a posteridade, de xeito que algunhas familias da alta sociedade virxiniana afirman ser descendentes seus.

O personaxe homónimo do filme de Disney Pocahontas está baseado no personaxe histórico, ó cal pon a súa voz o actor sioux e militante do American Indian Movement Russell Means. No filme The New World é August Schellenberg quen interpreta ó Xefe Powhatan.