Winslow Homer

Na Galipedia, a Wikipedia en galego.
Winslow Homer.
Breezing Up, 1876.

Winslow Homer, nado en Boston o 24 de febreiro de 1836 e finado en Prout's Neck, Maine o 29 de setembro de 1910, foi un pintor norteamericano.

Traxectoria[editar | editar a fonte]

Entre 1854 comezou a traballar como aprendiz de litógrafo en Boston e en 1857 estableceuse en Nova York pola súa conta, con encargos para revistas como Ballou's Pictorial e Harper's Weekly.

En 1859 abriu o seu propio estudo e comeza a súa carreira como pintor, en 1861 realiza as súas primeiras pinturas ao óleo. En 1863 Harper's Weekly enviouno fronte durante a Guerra Civil americana para facer ilustracións da guerra e de escenas mundanas, que non tiveron moita aceptación no seu tempo, pero que tiveron moita influencia no seu traballo posterior. De volta ao seu estudo realizou numerosas pinturas baseadas nas experiencias vividas na fronte, caracterizadas polos seu realismo e obxectividade, entre as súas pinturas destacan Sharpshooter on Picket Duty e Prisoners from the Front.

En 1867 viaxa a París e pinta paisaxes ensaiando coas posibilidades pictóricas da luz.

De volta aos Estados Unidos pinta escenas da vida idílica no rural ou de nenos a xogar. En 1873 realiza a súa primeira serie de acuarelas, cun estilo natural,limpo, fresco e espontáneo. En 1875 realizou as últimas ilustracións para o Harper's Weekly e visita por vez primeira Prout's Neck, preto de Scarborough.

En 1881 viaxa a Inglaterra, pasando un tempo na localidade de Cullercoats, Northumberland, onde pinta aos pescadores e o mar, restrinxiu a súa paleta e deixou a violencia presente nas súas obras anteriores

En 1883 establécese definitivamente en Prout's Neck, nun ambiente de soedade, pasando moitos invernos en Nassau, Cuba e Florida e algúns veráns en Adirondacks, onde pintou Jumping Trout (1889), unha das súas obras máis coñecidas. Centrase no estudo das zonas mariñas, con cadros como Banks Fisherman, Eight Bells, Gulf Stream, Rum Cay ou Mending the Nets.