Vitorino Núñez

Vitorino Núñez

Nome orixinal	(es) Victorino Núñez Rodríguez
Biografía
Nacemento	20 de maio de 1936 Quiroga, España
Morte	19 de xuño de 2010 (74 anos)
Causa da morte	Morte natural  (Cancro )
3º Presidente do Parlamento de Galicia
16 de xaneiro de 1990 – 18 de novembro de 1997 ← Tomás Pérez Vidal – José María García Leira →
Deputado no Congreso dos Deputados
20 de novembro de 1989 – 15 de xaneiro de 1990 – Manuel Prado López → Lexislatura: IV lexislatura de España Circunscrición electoral: Ourense Electo en: Eleccións Xerais 1989 en España
Senador de España
1986 – 1989
Presidente da Deputación de Ourense
1979 – 1990 ← David Ferrer Garrido – Xosé Luís Baltar →
Deputado do Parlamento de Galicia
Datos persoais
País de nacionalidade	España
Actividade
Lugar de traballo	Madrid Ourense Santiago de Compostela A Rúa
Ocupación	político
Lingua	Lingua castelá e lingua galega
Familia
Fillos	Victoria Núñez López

Para o escultor véxase Victorino Núñez Díaz

Victorino Núñez Rodríguez, nado en Quiroga o 20 de maio de 1936 e finado o 19 de xuño de 2010, foi un avogado e político galego.

Traxectoria

Licenciado en Dereito, aprobou as oposicións a secretario municipal e foi destinado ao concello da Rúa na década dos sesenta. Nese posto coincidiu co empresario e político Euloxio Gómez Franqueira, que o introduciu na Caixa Rural de Ourense e como colaborador del na empresa Coren-Uteco.

Sería con Gómez-Franqueira con quen tamén daría os primeiros pasos políticos ao fundar canda Xosé Quiroga Suárez Acción Política Orensana nos albores da transición democrática, que, despois de negociar co Partido Popular de Pío Cabanillas, acabaría integrándose directamente en UCD. Coa UCD accede á presidencia da Deputación de Ourense en 1979, logo de saír elixido como concelleiro en Ourense. Logo da desfeita electoral dese partido nas eleccións xerais de 1982, Victorino Núñez forma parte do núcleo fundador de Centristas de Ourense, abrocho á súa vez de Coalición Galega.

Despois do derramo cerebral que afectou a Euloxio Gómez Franqueira e que deixou a Coalición Galega sen un liderado claro, Vitorino Núñez abandonaría ese partido en 1985 para recompoñer o grupo inicial baixo o nome de Centristas de Galicia. Esta pequena formación, con implantación fundamentalmente na provincia de Ourense presentouse a varios comicios coaligada co Partido Popular, no que finalmente terminaría por integrarse.

Tras as eleccións lexislativas de 1986 obtivo un escano no Senado, do que tomou posesión o 22 de xuño e en outubro de 1989 saíu elixido deputado no Congreso. En 1990 saíu elixido deputado no Parlamento de Galicia, e mercé aos acordos entre a súa formación e o Partido Popular foi escollido presidente do Parlamento durante sete anos (entre 1990 e 1997), correspondentes á terceira e cuarta lexislaturas.

Logo do seu paso polo parlamento galego regresou ao Senado en 1997, escollido en representación da comunidade autónoma, ata o 20 de xaneiro de 2004, data en que se disolveron as cámaras.

Vida persoal

Casou e tivo catro fillos, entre eles Victoria Núñez López. Foi ademais vogal do consello de administración de Promocións Culturais Galegas, a sociedade que editaba o xornal A Nosa Terra.

Faleceu como consecuencia dun cancro e foi incinerado e soterrado en Quiroga.

Galardóns

Foi nomeado fillo predilecto do concello de Quiroga en novembro de 2008.

Véxase tamén

Bibliografía

• Barrera, F., ed. (2002). Gallegos. Quién es quien en la Galicia del siglo XXI (en castelán). El Correo Gallego. pp. 400–401. ISBN 84-8064-113-4. 

Outros artigos

• Lista de senadores galegos desde a Transición
• Lista de deputados galegos no Congreso desde a Transición