Trasdeza
Trasdeza foi unha das antigas xurisdicións máis orientais da outrora provincia de Santiago. Correspóndese practicamente co actual concello de Silleda e todas as súas freguesías pertencían ao arciprestado de Trasdeza (hoxe arciprestado de Deza-Trasdeza). Tamén se coñece con este nome o propio territorio de Silleda, coincidente coas terras bañadas polo río Toxa.
Xeografía[editar | editar a fonte]
Asentada no que é agora o concello de Silleda, limitaba ao norte co río Deza e o coto de Carboeiro, ao sur coa xurisdición de Montes, leste co río Deza de novo, e ao oeste, coa xurisdición de Tabeirós. Por ela transcorrían os ríos Toxa, Escuadro, Refoxos e do Candán, así como o propio Deza, que a bordeaba.
Esta xurisdición contaba con 23 freguesías, ademais de diversos cotos como os de Refoxos, Bazar, Rosende, San Nicolás, Outeiro e Vilariño.
Historia[editar | editar a fonte]
Trasdeza pertenceu durante todo o século XVIII e parte do XIX á antiga provincia de Santiago. No relixioso, pertencía na súa totalidade á diocese de Lugo, pero era do señorío xurisdicional do arcebispo de Santiago. Aínda que case todas as freguesías eran de señorío abadengo[1], quedando excluídas as seguintes:
- Abades, de señorío abadengo e eclesiástico (o Cabido de Santiago)
- Negreiros, de señorío abadengo e eclesiástico (o arcediago de Deza)
- Manduas, de señorío abadengo e secular (D. Juan de Neira, D. José Caamaño e o Marqués de Santa Cruz)
- Ponte, de señorío abadengo e militar (Encomenda de Beade, á súa vez dependente da Orde de San Xoán, e Orde de San Xoán).
Notas[editar | editar a fonte]
- ↑ O señorío abadengo fai referencia á xurisdición ordinaria do arcebispo de Compostela
Véxase tamén[editar | editar a fonte]
Bibliografía[editar | editar a fonte]
- Rodríguez Ferreiro, Hilario (1973). La tierra de Trasdeza: Una economía rural antigua. Santiago de Compostela.