Termigal

Termigal é o organismo encargado da coordinación xeral das actividades terminolóxicas relativas á lingua galega, de promover e levar a cabo a elaboración de recursos terminolóxicos e de garanti-la súa dispoñibilidade, e de promove-lo desenvolvemento de produtos de enxeñaría lingüística en que a terminoloxía teña unha especial incidencia . Foi creado en 1997 mediante un convenio asinado entre a RAG (coma autoridade académica encargada da normativización da lingua galega) e a Dirección Xeral de Política Lingüística da Consellería de Educación e Ordenación Universitaria (coma organismo competente en materia de política lingüística). Actualmente está establecido coma un proxecto do Centro Ramón Piñeiro para a Investigación en Humanidades (CIRP) e incluído coma unha sección da RAG, centrándose en definir a terminoloxía técnica en galego. Na actualidade está coordinado por Manuel González González e nel traballan tres bolseiros que xestionan os seguintes servizos:

• con apoio exterior, desenvolven terminoloxía específica e sistemática para determinadas áreas de especialidade, con proxectos a longo prazo moi amplos e variados (hostelaría, mundo empresarial, botánica, oficios e profesións, automoción, música);
• resolución de consultas realizadas por teléfono ou mediante o correo electrónico, principalmente procedentes de tradutores, terminólogos ou servizos de normalización lingüística.

O Termigal non ten páxina web propia e non dispón de ningún repertorio de público acceso en Internet á maneira do Cercaterm do seu homólogo Termcat.cat. A súa presenza na rede é a través do sitio web do CIRP, o seu correo electrónico é termigal(arroba)cirp.es e o seu teléfono de consultas é 981542653.

Publicacións

Conta xa con varias publicacións, agrupadas nunha colección numerada que consiste nos seguintes volumes:

1. Victorino Gutiérrez Aller (1998) Formulario notarial. Santiago de Compostela: Termigal, CIRP-Xunta de Galicia. ISBN 8445322826
2. Xoaquín Monteagudo Romero (1998) Regulamentos municipais. Santiago de Compostela: Termigal, CIRP-Xunta de Galicia. ISBN 8445323784
3. Fernando Lahuerta Mouriño & Francisco X. Vázquez Álvarez & Xosé L. Rodríguez Villanueva (2002) Vocabulario multilingüe de acuicultura Santiago de Compostela: Termigal, CIRP-Xunta de Galicia. ISBN 844533316X
4. Fernando Lahuerta Mouriño & Francisco X. Vázquez Álvarez (2000) Vocabulario multilingüe de organismos acuáticos Santiago de Compostela: Termigal, CIRP-Xunta de Galicia. ISBN 8445329138
5. Edith Pazó Fernández (2005) Dicionario galego de televisión. Santiago de Compostela: Termigal, CIRP-Xunta de Galicia. ISBN 844534062X

Previamente xa existían publicacións sen estar adscritas especificamente ó Termigal, entre as que destaca:

• Pedro Benavente Jareño (1995) Guía de alimentación. CIRP-Xunta de Galicia. ISBN 8445313010

En colaboración con outras institucións terminolóxicas, traballáronse os seguintes temas:

• artes gráficas
• comercio electrónico
• medio natural e ecoloxía
• química (nome e símbolo dos elementos)
• sida
• telecomunicacións
• transporte turístico

Outros temas nos que se está a traballar son:

• hostalaría, gastronomía, alimentación e turismo
• relacións laborais
• botánica e taxonomía
• automoción
• música
• márketing
• informática

Véxase tamén

• Didáctica, Metodoloxía e Materiais
• Terminoloxía
• Normativización lingüística
• Normalización lingüística
• Planificación lingüística
• Lingua galega
• Normativa