Stefan (título)
Stefan (en serbio cirílico Стефан, galeguizado Estevo) foi un nome adoptado por todos os gobernantes da Casa de Nemanjić do Reino de Serbia na época medieval.
O nome deriva do grego Στέφανος Stéphanos, que significa "coroado con coroa de flores", que á súa vez vén da palabra στέφανος, "coroa, honor, recompensa", literalmente "o que rodea ou abarca".[1][2]
Todos os gobernantes de Serbia despois de Estevo Nemanjić ou Estevo Prvovenčani (Stefan Prvovenčani, Estevo o Primeiro Coroado) engadiron o nome de Stefan (en galego Estevo) antes dos seus nomes de nacemento ao ascender ao trono, como unha maneira de honrar aos primeiros gobernantes da súa dinastía, Stefan Nemanja e Stefan Prvovenčani.
Stefan Nemanja, que veneraba a Santo Estevo como o seu santo padrón, era descendente da Casa de Vojislavljević, gobernantes de Zahumlia. A Casa de Nemanjić leva o seu nome, e deu 11 monarcas serbios entre 1166 e 1371, cada un dos cales utilizou Stefan como parte do seu nome de reinado, antepoñéndoo ao seu propio. A casa é, polo tanto, tamén coñecida como "dinastía Stefan".
Debido a que todos os monarcas da dinastía o utilizaron, o nome asumiu un significado simbólico. Converteuse en parte inseparábel da monarquía, e todos os aspirantes ao trono denotaron a súa pretensión real mediante a adopción deste nome.
Algúns gobernantes reinaron con nomes duplos: Stefan Nemanja, Stefan Radoslav, Stefan Vladislav e Stefan Uroš, mentres Prvovenčani e Dečanski son epítetos, non nomes. A natureza exacta de Dragutin e Milutin —nomes ou sobrenomes (alcumes)— non está demostrada. Porén, a diferenza dos nomes Nemanja, Radoslav, Vladislav, Uroš, e mesmo Dušan, nunca aparecen nas fontes oficiais contemporáneas. Polo tanto alcumes como Prvovenčani e Dragutin utilízanse simplemente para seren diferenciados, xa que Stefan era o seu nome oficial.[3]
En 1345, Stefan Uroš IV Dušan de Serbia asumiu o título imperial de tsar, instaurando o Imperio serbio.
Lista de monarcas serbios co título de Stefan[editar | editar a fonte]
- Stefan Nemanja (1166–1196)
- Stefan Nemanjić (1196–1228)
- Stefan Radoslav (1228 – 1233)
- Stefan Vladislav (1233-1243)
- Stefan Uroš I (1243–1276)
- Stefan Dragutin (1276–1282)
- Stefan Milutin (1282–1321)
- Stefan Dečanski (1321–1331)
- Stefan Dušan (1331–1355)
- Stefan Uroš V (1346-1371)
Véxase tamén[editar | editar a fonte]
Notas[editar | editar a fonte]
- ↑ "Online Etymology Dictionary". Etymonline.com. Consultado o 6/2/2012.
- ↑ στέφανος Henry George Liddell, Robert Scott, A Greek-English Lexicon, in Perseus.
- ↑ Serbian Unity Congress. Serbian Medieval History.