Serveis Ferroviaris de Mallorca

Serveis Ferroviaris de Mallorca (SFM) é unha empresa pública española que desde 1994 encárgase da explotación das liñas de ferrocarril e metro de vía estreita da illa de Mallorca, coa excepción da liña Palma-Sóller xestionada por Ferrocarril de Sóller S.A. A empresa está dirixida por un xerente de designación directa do Goberno Balear.

A lonxitude de liñas explotadas por esta empresa é de 85 km, correspondendo 77 km ás liñas puramente ferroviarias e 8 km ao Metro de Palma.

Historia[editar | editar a fonte]

A empresa fundouse en 1994 cando o Goberno Balear recibiu as competencias en materia de xestión e control dos ferrocarrís públicos de vía estreita que naquel momento había en Mallorca. Ata entón a empresa estatal encargada destes ferrocarrís era Ferrocarriles Españoles de Vía Estrecha (FEVE).

Desde entón unha das prioridades da nova empresa foi a recuperación do ferrocarril mellorando servizos e instalacións e reabrindo liñas pechadas. Aumentouse o orzamento permitindo a creación de novas vías e uns talleres de reparación no Polígono de Son Fuster (Palma). Restaurouse e reformouse a estación de Palma e abríronse novas estacións para dar servizo aos novos núcleos de poboación. Renovouse totalmente a frota de trens con unidades da marca CAF.

En 1997 comezaron as obras para reabrir o tramo Inca-Sa Pobla finalizando no ano 2000. Ese mesmo ano empezaron as obras de remodelación da antiga liña Inca-Manacor, sendo operativa en 2003.

Durante estes anos o número de usuarios foi crecendo de forma continuada. Actualmente calcúlase que o 10% dos desprazamentos realizados no corredor Palma-Inca fanse en ferrocarril e preténdese que alcance o 25%.

Liñas[editar | editar a fonte]

Ferrocarril[editar | editar a fonte]

As tres liñas comparten un tramo común de dobre vía (Palma-Enllaç), sendo o resto do traxecto de vía única. Os 33 km deste tramo están electrificados, quedando para un futuro a medio prazo a electrificación da estación de Enllaç a Manacor e Sa Pobla.

Liña	Percorrido	km
L1	Palma - Inca	28
L2	Palma - Enllaç - Sa Pobla	46
L3	Palma - Enllaç - Manacor	33

Metro[editar | editar a fonte]

Artigo principal: Metro de Palma.

Aproveitando o inicio das obras do ferrocarril de SFM, o presidente das Illas Baleares, Jaume Matas, anunciou a construción da primeira liña de metro de Palma. En agosto de 2005 empezaron as obras do túnel exclusivo do metro ao seu paso polo Polígono Industrial de Son Castelló. A liña ten a mesma amplitude de vía que o resto de liñas da compañía, un metro, e é a única completamente electrificada. O metro foi inaugurado en abril de 2007 e pechado cinco meses máis tarde, despois de que as instalacións alagásense debido a diversos fallos na construción e principalmente á deficiente evacuación de auga no polígono de Son Castelló. O servizo renovouse en xullo de 2008.