Salmónidos

Os salmónidos son a familia Salmonidae, a única da orde dos Salmoniformes, peixes mariños e de río que se distribúen de forma natural por todo o hemisferio Norte, pero que foron amplamente introducidos polo home en augas frías de ríos de todo o mundo para a pesca.

O seu nome procede do latín salmo, que é como chamaban na antiga Roma a estes peixes. Aparecen por primeira vez no rexistro fósil no Cretácico superior.

Anatomía

Teñen escamas pequenas tipo cicloide; non presentan espiñas nas aletas, tendo todos eles no seu lombo unha aleta adiposa; algunha especie pode acadar os 1,5 metros de lonxitude máxima.

Hábitat e bioloxía

Moitos destes peixes son anádromos, pasando parte da súa vida no mar, pero retornando aos ríos que remontan até preto da súa cabeceira para desovar nos leitos de grava; tras isto moitos deles morren.

Importancia para o home

Son especies moi valoradas na pesca, tanto comercial como deportiva; tamén moitas son moi usadas na acuicultura, tendo gran importancia a súa comercialización para a alimentación humana.

Xéneros

Existen 209 especies válidas, agrupadas nos 11 xéneros seguintes [1]:

• Subfamilia Coregoninae:
  • Coregonus (Linnaeus, 1758)
  • Prosopium (Jordan, 1878)
  • Stenodus (Richardson, 1836)
• Subfamilia Salmoninae:
  • Acantholingua (Steindachner, 1892)
  • Brachymystax (Günther, 1866)
  • Hucho (Günther, 1866)
  • Oncorhynchus (Suckley, 1861)
  • Salmo (Linnaeus, 1758)
  • Salvelinus (Richardson, 1836)
  • Salvethymus (Chereshnev e Skopets, 1990)
• Subfamilia Thymallinae:
  • Thymallus (Linck, 1790)