Sociedade Deportiva Compostela

Compostela

Nome	Sociedade Deportiva Compostela
Alcume(s)	Esedé, Compos, Picheleiros
Fundación	26 de xuño de 1962 (refundado en 2006)
Estadio	Multiusos de San Lázaro, Santiago de Compostela, Galicia
Inauguración	24 de xuño de 1993
Capacidade	13.000
Presidente	Antonio Quinteiro
Adestrador	Fredi
Liga	3ª – Grupo 1
2012–13	3º
Vestimenta	Trezze
Páxina web	Páxina web oficial
Na casa Fóra

A Sociedade Deportiva Compostela é un equipo de fútbol de Santiago de Compostela. Fundado en 1962, xoga na actualidade na Terceira División Española.

O club pasou 4 tempadas consecutivas en Primeira División entre 1994 e 1998, polo que ocupa o 39º lugar na Clasificación histórica de Primeira.

Nome do club

• Sociedad Recreativa Compostela (1962)
• Sociedad Deportiva Compostela (1962–1994)
• Sociedad Deportiva Compostela, S.A.D. (1994–2007)
• Sociedad Deportiva Campus Stellae, S.A.D. (2007–2011)
• Sociedad Deportiva Compostela, S.A.D. (2011– )

Historia

O club foi fundado o 26 de xuño de 1962, e comezou a xogar nas divisións rexionais. Tras varios anos na terceira división, logrou ascender á segunda B na tempada da creación desta categoría, a 1977-78.

En 1988 chegou á presidencia do club o empresario santiagués do sector da electricidade José María Caneda, e en 1989 incorpórase á disciplina do equipo o adestrador Fernando Castro Santos. Na primeira tempada dese, a 1989-90, o equipo regresou á segunda división B, e ó ano seguinte logrou ascender á segunda división logo de quedar terceiro na fase regular e vencer no grupo de ascenso, superando ó Alcoyano, o CD Badajoz e o Alavés.

O equipo permaneceu en segunda división durante tres tempadas: na primeira queda de sexto e na segunda de duodécimo, ata que na de 1993-94 quedou terceiro e puido xogar a promoción de ascenso a primeira división fronte ó Rayo Vallecano. Tras dous partidos que acabaron con empate xogados en cadanseu campo, disputouse un terceiro nun campo neutral (o Estadio Carlos Tartiere de Oviedo), que rematou coa vitoria compostelá por 3 a 1, con goles de Ohen (2) e José. O equipo titular dese partido estaba formado por Iru, Modesto II, Tocornal, Modesto I, Bellido, Bodelón, Abadía, Fabiano, Lucas, Ohen e Suso Moure. A derrota supúxolle ó Rayo Vallecano a marcha da súa estrela Hugo Sánchez. Xogou na primeira división catro tempadas seguidas, ata a 1997-98.

Logo de 7 anos con Fernando Santos de adestrador, para a tempada 1995-96 fichou a Fernando Vázquez. Ese mesmo ano o equipo logrou o seu mellor resultado, terminando décimo logo de seren subcampións de inverno, por detrás do Atlético de Madrid. Trala tempada 1997–98 o equipo resultou 17º na táboa e xogou a promoción contra o Villarreal CF. Tras empatar (0–0) en El Madrigal e novamente (1–1) en San Lázaro, o equipo compostelán descendeu a Segunda División.

O presidente da entidade tomou o descenso como unha tempada de transición, e intentou recuperar a máxima categoría. Para isto non escatimou en gastos, mantendo boa parte da formación anterior e fichando outros xogadores de renome, como os internacionais Nando e Dmitri Radchenko. Porén, o equipo quedou oitavo, e as débedas empezaron a facerse patentes. Nas seguintes campañas o equipo tivo complicacións deportivas e trala tempada 2000–01 descendeu a Segunda División B. Nesa categoría volveuse cometer o erro de manter á formación da campaña anterior cos mesmos salarios, e as débedas levaron consigo atrasos e complicacións nos pagos. Aínda así, o equipo terminou terceiro na campaña 2001–02, e superou na liguiña de ascenso ó Mérida UD, Valencia CF B e FC Barcelona B, volvendo a Segunda División.

A campaña 2002–03 foi ata agora a última na elite profesional, no seu regreso a Segunda. O equipo, dirixido por Luis Ángel Duque, terminou noveno malia estaren os xogadores toda a tempada sen cobrar. O impago das débedas a xogadores agravouse cando un xuíz, a falta de 2 días para concluír o prazo de inscrición, determinou que o club debía avalar 13 millóns de euros para continuar en ligas profesionais. Ó non poder presentarse dito aval, o equipo regresou a Segunda B, ascendendo no seu lugar o CD Leganés. Un ano despois, a marcha dos xogadores que non percibiron as débedas deixou a formación con poucos efectivos nun ano no que o equipo estivo a piques de desaparecer. A tempada concluíu co descenso a Terceira División tras acabar penúltimos, e un posterior descenso a Rexional por impago ós xogadores.

Tras catro tempadas no grupo norte da Rexional Preferente, na campaña 2007–08 quedaron campións de grupo, regresando á Terceira División. Ao ano seguinte ascenderon de novo, regresando á Segunda B. Pero só durou un ano o seu paso por esta categoría, descendendo novamente a Terceira División na tempada 2009–10. Porén, en agosto de 2010 o equipo foi descendido á división Rexional Preferente por motivos extradeportivos, o que levou aparellada a súa disolución como empresa. Foi continuada pola SD Campus Stellae. Na tempada 2010–11 quedou nun meritorio 8º posto na Rexional Preferente, tras dúbidas sobre a súa viabilidade. A metade da tempada accedeu á presidencia da Sociedade Deportiva o empresario Antonio Quinteiro, que asumiu a débeda da entidade. Plantexouse a posibilidade que na tempada 2011–12 competise de novo coa denominación de SD Compostela, algo que se cofirmou o 22 de xullo dese ano oficialmente.

Na tempada 1995–96, con Fernando Vázquez como adestrador, o cadro de xogadores do SD Compostela sería o seguinte:

Nº Posto País Xogador 1 POR Falagán 2 POR Fernando 3 DEF Mauro 4 DEF Nacho Fernández 5 DEF Villena 6 DEF Bellido 7 DEF Tocornal 8 DEF Virgilio 9 DEF Dulce 10 DEF Toño Castro 11 MED José Ramón 12 MED Lekumberri

Nº Posto País Xogador 13 MED Fabiano 14 MED Passi 15 MED Eraña 16 MED Abadía 17 MED Llorente 18 MED Toni 19 MED Skosic 20 DIA Ohen 21 DIA Christensen 22 DIA Paniagua 23 DIA Festus 34 DIA Vilaseca

Uniforme

• Uniforme titular: Camiseta branquiazul, pantalóns brancos e medias branquiazuis.
• Uniforme alternativo: Camiseta vermella, pantalóns vermellos e medias vermellas.

Estadio

Vista do estadio.

Artigo principal: Estadio Multiusos de San Lázaro.

O Estadio Multiusos de San Lázaro, con capacidade para 13.000 espectadores, foi inaugurado o 24 de xuño de 1993. Ten herba natural e mide 105 x 68 metros. Está situado na Avenida de Fernando Casas Novoa. Anteriormente o equipo xogara no Campo Municipal de Santa Isabel, en Vista Alegre.

Datos do club

• Tempadas en 1ª: 4
• Tempadas en 2ª: 7
• Tempadas en 2ªB: 11
• Tempadas en 3ª: 18 (Incluída a 2012/13)
• Tempadas en Preferente: 11

Datos en Primeira división

• Posto na Clasificación histórica de Primeira División: 39º
• Partidos xogados: 160
  • Gañados: 52
  • Empatados: 45
  • Perdidos: 63
  • Goles a favor: 143
  • Goles en contra: 231
  • Puntos conseguidos: 212
• Mellor posto: 10º (1995-96)
• Peor posto: 17º (1997-98)
• Maior goleada conseguida: 2-6 fronte ó Deportivo da Coruña (xornada 38, 1997-98)
• Maior derrota encaixada: 6-0 fronte ó Tenerife (xornada 1, 1996-97)

Historial na liga

Tempada	Categoría	Posto
1962/63	Rexional	—
1963/64	3ª	1º
1964/65	3ª	2º
1965/66	3ª	4º
1966/67	3ª	3º
1967/68	3ª	2º
1968/69	3ª	3º
1969/70	3ª	10º
1970/71	Rexional	—
1971/72	3ª	11º
1972/73	3ª	18º
1973/74	Rexional	—
1974/75	Rexional	—
1975/76	Rexional	—
1976/77	3ª	9º
1977/78	2ªB	18º
1978/79	3ª	12º

Tempada	Categoría	Posto
1979/80	3ª	1º
1980/81	2ªB	7º
1981/82	2ªB	15º
1982/83	2ªB	11º
1983/84	2ªB	14º
1984/85	2ªB	15º
1985/86	2ªB	18º
1986/87	3ª	6º
1987/88	3ª	4º
1988/89	3ª	3º
1989/90	3ª	1º
1990/91	2ªB	3º
1991/92	2ª	8º
1992/93	2ª	12º
1993/94	2ª	3º
1994/95	1ª	16º
1995/96	1ª	10º

Tempada	Categoría	Posto
1996/97	1ª	11º
1997/98	1ª	17º
1998/99	2ª	8º
1999/00	2ª	18º
2000/01	2ª	19º
2001/02	2ªB	3º
2002/03	2ª	9º
2003/04	2ªB	19º
2004/05	Preferente	—
2005/06	Preferente	14º
2006/07	Preferente	3º
2007/08	Preferente	1º
2008/09	3ª	1º
2009/10	2ªB	20º
2010/11	Preferente	8º
2011/12	Preferente	1º
2012/13	3ª	3º

Palmarés

• Terceira División de España (4): 1963-64, 1979-80, 1989-90 e 2008-09
• Preferente Autonómica de Galicia (2): 2007-08 e 2011-12
• Subcampión da Terceira División (2): 1964-65 e 1967-68

Véxase tamén

Ligazóns externas

• Páxina oficial do club
• Sempre Compos. Blog extraoficial
• SD Compostela. Web non oficial
• Web non oficial do SD Compostela