Rapunzel

Na Galipedia, a Wikipedia en galego.
Rapunzel
Johnny Gruelle illustration - Rapunzel - Project Gutenberg etext 11027.jpg
Ilustración de Johnny Gruelle (1880 - 1938).
Autor Irmáns Grimm
País Alemaña
Lingua alemán
Tema(s) Conto
Xénero(s) Conto de fadas, literatura infantil

Rapunzel (tamén coñecida en galego coma Raponcio) é un conto de fadas da colección dos Irmáns Grimm.[1]

Na colección de contos dos Irmáns Grimm, Rapunzel é o n.º 12.[2] Corresponde ao tipo 310 da clasificación de Aarne-Thompson: A doncela da torre.[3]

Enredo[editar | editar a fonte]

Unha parella que arelaba un fillo, moraban á beira dun xardín arrodeado de paredes que pertencía a unha feiticeira. A dona finalmente grávida, ve uns raponcios plantados no xardín, e cobízaas até a morte. O seu home decide ir apañar algúns para ela e remata enfrontándose coa meiga, a Dama Gothel, que o acusa do roubo. El prégalle piedade, entón a feiticeira dálle algúns raponcios para que os leve para a casa coa condición de que o fillo que está a esperar a súa dona lle sexa entregado no intre do seu nacemento. El concorda. Nado o meniño, a meiga aparece, dálle o nome de Rapunzel e lévaa. Cando cumpre doce anos e se convirte nunha mociña, a feiticeira encérraa nunha torre no medio da fraga. A Dama Gothel ia visitala todos os días e lle pedía que deixase caer os seus longos cabelos dourados, para despois gabear até a torre. («Rapunzel, Rapunzel, deixa o teu pelo caer, así podo rubir a escada dourada»).

Un día, o fillo do Rei ouve a Rapunzel cantando na torre, procura unha porta mais non atopa ningún xeito de entrar; despois de escoitala cantar outras veces, decide agardar. Un día olla á feiticeira visitando a Rapunzel, e deste xeito aprende como chegar até a rapariga. Pediulle que deixase caer os seus cabelos e rubiu onda ela. Daquela comezou a frecuentala, namorouse e propúxolle matrimonio. Ela aceptou.

Xuntos planean un xeito de sacala da torre: el acudirá todas as noites, evitando á meiga que vai polo día, e levaralle seda, coa que Rapunzel ha tecer até formar unha escada. A feiticeita descobre que o fillo do Rey está a visitar a moza, polo que lle corta o pelo e a despeixa no medio dun campo ermo.

Á noite seguinte, cando o fillo do Rei chega á torre, a meiga deixa caer as súas trincas até o chan. Logo de gabear até o alto da torre e se decatar que era a meiga a dona das trincas, esta promételle que endexamais volverá a ver a Rapunzel. El, desesperado, cae da torre sobre duns espiños que había abaixo, quedando cego e resognándose a non ver máis á moza. Rapunzel, que quedara grávida do Príncipe, dá á luz dous xemelgos soa no deserto. Ao pouco tempo, vagando o Príncipe cego polo deserto, atopa a Rapunzel e seus fillos, que ao encontralo en tal estado decide levarlo á súa casa. Rapunzel chora de dor pola situación, canendo as bágoas nos ollos do garrido príncipe que, de súpeto, recupera a vista. Despois marchan ao reino cos seus dous fillos e son felices para sempre.

Versións[editar | editar a fonte]

Das innumerábeis versións literarias e cinematográficas quizais a máis sonada sexa o filme da Disney de 2010: Tangled (en Galicia estreada en castelán coma Enredados), unha versión soamente inspirada no conto orixinal.

Notas[editar | editar a fonte]

  1. En alemán, «Rapunzel» significa «raponcio». O raponcio ou rapuncio (Campanula rapunculus) é unha planta silvestre cuxa raíz, con forma de nabo, é comestíbel.
    • Nomenclatura vernácula da flora vascular galega. Santiago de Compostela, Xunta de Galicia, 1991
  2. Grimm, KHM 012.
    • KHM é o acrónimo empregado no catálogo dos contos dos Irmáns Grimm: KHM es Kinder- und Hausmärchen (Contos da nenez e do fogar).
  3. AT 0310: The Maiden in the Tower.

Véxase tamén[editar | editar a fonte]

Commons
Commons ten máis contidos multimedia na categoría: Rapunzel Modificar a ligazón no Wikidata

Ligazóns externas[editar | editar a fonte]