Río Ruvuma

Na Galipedia, a Wikipedia en galego.
Río Ruvuma (ou Rovuma)

País Tanzania
Mozambique
Rexión n/d
Nacemento Montañas Matogaro
Altitude n/d
Lonxitude 800 km
Caudal medio Na foz: 475 m³/s
Conca 155 500 km²
Desembocadura Océano Índico
Localización do río Ruvuma nun mapa de Tanzania

O río Ruvuma (anteriormente coñecido como Rovuma, como aínda é coñecido en Mozambique) é un río da África oriental que discorre formando durante grande parte do seu curso fronteira entre Tanzania e Mozambique. Ten unha lonxitude duns 800 km, drena unha ampla conca de 155.500 km² e ten un caudal de 475 m³/s na súa desembocadura.[1]

Xeografía[editar | editar a fonte]

O río Ruvuma nace na parte suroccidental de Tanzania, na rexión homónima de Ruvuma, a uns 50 km ao sudoeste da cidade de Songea. O río baixa das ladeiras das montañas Matogaro situadas nunha meseta ondulada, a máis de 900 de altitude, ao leste do lago Nyasa. O río flúe primeiro cara o oeste, logo vai cara o sur durante un tramo duns 70 km. Tras recibir pola dereita ao río Msinje, que vén do sur, o Ruvuma torna repentinamente e encamíñase cara o leste, rumbo que manterá en xeral até o final. A partir de aquí o río será a fronteira natural nunha sección de máis de 650 km entre Tanzania, no norte, e Mozambique, no sur.

No seu camiño cara o leste, o Ruvuma pasa cerca da base dunha árida meseta escarpada de pedra arenita, situada no norte, da que descenden pequenos ríos de profundas canles na base da meseta (algúns son longos como o Lukimva e o Muhuvesi). Pola ribeira oposta, a dereita, polo sur, o Ruvuma recibe ríos máis longos que veñen de amplos vales do sur, entre eles o Luchulingo, o Lussanhando e o río Lugenda.

Máis abaixo, o Ruvuma varía moito de anchura, contendo en moitas partes grandes illas boscosas que se elevan por encima do nivel das crecidas, e que a miúdo están habitadas. O río é vadeable en moitos lugares na estación seca. O curso inferior do Ruvuma, normalmente ten máis de 500 m de ancho, pero xeralmente flúe a través dun pantanoso vale. A súa foz, ten case 1,5 km de ancho e atópase ao sur da cidade tanzana de Mtwara e ao norte do mozambiqueño Cabo Delgado.

Ponte[editar | editar a fonte]

En 1975, pouco despois da independencia de Mozambique, propúxose a construción dunha ponte que cruzase o río e unise Mozambique e Tanzania, denominado Ponte da Unidade (Unity Bridge). Fixéronse estudos e algunhas obras a principios de 1980, mais a ponte non rematou por falta de fondos. No 2002, os dios gobernos asinaron un acordo para construír unha ponte de 600 m que cruzase o río. As primeiras pedras colocáronse o 10 de outubro de 2005, tanto en Tanzania como en Mozambique. A construción estaba prevista que rematase 2008, mais aí están.

Antes era posible cruzar o río cun pequeno buque ro-ro (situado na parte de Tanzania), que podía levar 3 jeeps. O ferry afundiuse no 2008 e non se substituíu. A poboación local ofrece un transporte para os vehículos consistente en tres barcos con táboas atadas. En tempos de secura, o río pode ser vadeado cun adecuado vehículo.

Hai unha pequena ponte construída no 2007, chamada Unity Two, na zona alta do río, preto de Matchedge (Mozambique).

Notas[editar | editar a fonte]

  1. Nakayama, Mikiyasu (2003). International Waters in Southern Africa. p. 9. ISBN 9280810774. ; online en Google Books.