Río Barcés
| Río Barcés | |
|---|---|
| País | España |
| Rexión | Galiza |
| Nacemento | Cerceda |
| Desembocadura | Encoro de Abegondo - Cecebre |
  | |
| Concas fluviais do Barcés e do Mero | |
O río Barcés é un curso fluvial da provincia da Coruña que nace no concello de Cerceda e desemboca no encoro de Cecebre.
O curso alto, chamado aínda rego Barcés, é tributario do lago das Encrobas. Dende aí traza un percorrido en dirección nordés até confluír co río Mero en Orto, Abegondo, a unha altitude de 40 metros sobre o nivel do mar, onde ambos forman o encoro de Abegondo - Cecebre[1], espazo declarado zona especial de conservación (ZEC).
O Barcés é o principal dos colectores secundarios da conca do río Mero, e recolle as augas da aba meridional dos montes do Xalo e das terras de Cerceda.
Ecoloxía: flora e fauna[editar | editar a fonte]
O comezo do río Barcés atópase nun bosque ripario (vexetación típica das ribeiras de ríos e regatos)[2] de salgueiros e ameneiros. Cara ao fondo do río apréciase un aumento da vexetación, formando un bosque de ribeira, que medra nun espazo estreito e longo estendéndose en paralelo ao curso da auga. Nese último treito destaca a presenza do chopo negro.[3]
Este bosque de ribeira é hoxe un enorme ecosistema de algo máis de mil hectáreas con aproximadamente 800 000 árbores (medio millón foron plantadas nos últimos anos): bosques de carballos, castiñeiros, ameneiros, salgueiros... que se reproducen polos seus extremos. Están catalogadas actualmente 862 especies de animais e vexetais, segundo o estudo da Estación de Hidrobioloxía Encoro do Con, da Universidade de Santiago. Nunha excursión de pouco máis dunha hora é posíbel cruzarse (máis ben cruzan eles diante) cunha manda de xabarís, varias aves rapaces, lebres... Tamén hai lobos, raposos, coellos, troitas de gran tamaño, aves migratorias cando é a súa época, e gaivotas.[4]
O corredor ecolóxico do río Barcés[editar | editar a fonte]
Na actualidade, a Reserva da biosfera Mariñas Coruñesas e Terras do Mandeo e a Universidade da Coruña, colaboran nun estudo financiado pola "Cátedra de Desenvolvemento Sostíbel Hijos de Rivera-UDC", que ten como obxectivo que o río Barcés e o seu bosque de ribeira funcionen como un corredor ecolóxico que conecte o encoro de Abegondo-Cecebre co lago das Encrobas, contribuíndo á calidade da auga que se consuma na ára da Coruña. Neste raballo, dirixido polos doutores da UDC María José Servia e Jaima Fagúndez, propóñense medidas de mellora do bosque, incluíndo a restauración pasiva por rexeneración natural nas áreas cun nivel medio de degradación, e medidas de reforestación nas áreas moi degradadas.[5]
No traballo avalíase o estado ecolóxico do bosque de ribera do Barcés sobre a base de que existe unha relación directa entre o estado do bosque e o do medio fluvial, a calidade da auga e as comunidades faunísticas, empregando o concepto «o bosque como indicador da saúde do río», establecendo indicadores específicos, así como unha clasificación dos impactos sobre o ecosistema do bosque, definindo medidas para a súa conservación. Os autores, ademais, indican que «a colabroación cos propietarios, a educación e a implicación da sociedade serán indispensábeis nas seguites fases do proxecto».[5]
Notas[editar | editar a fonte]
- ↑ "Embalse de Cecebre: Ríos Mera y Barcés". Guías masmar. Consultado o 7 de xaneiro de 2022.
- ↑ Bosque ripario en Infojardín.
- ↑ "Orde do 14 de setembro de 2012 de aprobación definitiva do Plan Xeral de Ordenación Municipal do Concello de Abegondo". Arquivado dende o orixinal o 08 de agosto de 2013. Consultado o 25 de agosto de 2013..
- ↑ "El lago azul de Cerceda.". La Voz de Galicia.
- ↑ 5,0 5,1 Abegondo, La Voz (7 de xaneiro de 2022). "La Reserva y la UCD analizan el bosque de ribera del río Barcés". La Voz de Galicia. Consultado o 7 de xaneiro de 2022.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Río Barcés |
