Preso político

Na Galipedia, a Wikipedia en galego.

Un preso político é aquel que permanece na cadea ou detido dalgún outro xeito, por exemplo, baixo arresto domiciliario, porque as súas ideas representan un desafío ou unha ameaza para o sistema político establecido, sexa este da naureza que sexa. Como as opinións ou as actitudes non acostuman ser obxecto de lexislación, adoita seren difícil determinar exactamente que son os presos políticos a partir dos cargos que se lles imputan; unha excepción a constitúen os acusados de traizón ou espionaxe, a pesar de que xeralmente non se lles considera presos políticos. A condición de preso político, polo tanto, adoita ser obxecto de disputas; moitos dos prisioneiros considerados políticos por grupos de activistas son cualificados polos gobernos aos que se opoñen de "terroristas" ou "subversivos".

En consecuencia, poucas veces unha autoridade estatal admite a existenza de presos políticos; os críticos do goberno alegan que os procedimentos legais empregados están deseñados para agochar a condición de preso político. Isto pode abranguer a invención de cargos criminais, ou a negativa de beneficios concedidos a outros presos en situación semellante, así como a aplicación de poderes especiais, como o estado de excepción.

A lexislación actual considera, en xeral, que a prisión por motivos políticos é unha violación dos dereitos humanos de liberdade de conciencia e expresión. Organizacións internacionais, como Amnistia Internacional, mobilízanse por todo o mundo solicitando a liberación de presos de conciencia. Para evitar problemas cos gobernos, AI limita as súas accións á liberación de persoas que non teñan defendido ou practicado a violencia. Isto fai que haia prisioneiros políticos que non sexan prisioneiros de conciencia.

Ligazóns externas[editar | editar a fonte]