Prensa de viño

Na Galipedia, a Wikipedia en galego.
O xornalista estradense Manuel García Barros á beira dunha prensa tradicional galega na Estrada.
Prensa moderna de viño.

Unha prensa de viño[1] é un dispositivo empregado para extraer o zume de uvas como parte do proceso de produción do viño. Existen varios tipos de prensas utilizadas polos vitivinicultores mais a súa funcionalidade é a mesma. Cada tipo de prensa emprega a presión controlada para ceibar o zume do bago. A presión non pode ser excesiva, para evitar crebar a sementes e aportar un exceso de tanino ao viño.[2] O home está a producir viño dende o 6.000 aC; no ano 2011 desenterrouse unha prensa de viño en Armenia que contiña vestixios de elaboración de viño tinto de hai 6.000 anos.[3] As prensas son comúns na diferentes zonas de produción de viño de Galiza, normalmente instaladas nas adegas das casas ou nunha construción senlleira, denominada lagar; de feito moitas veces a prensa recibe o nome de lagar[4].

Tipos de prensas[editar | editar a fonte]

A prensa tradicional galega consta dunha soleira tallada en pedra de gra no que se sitúa a gaiola de madeira ou mesmo un gran pío granítico fechado cunha tampa sobre a que acouga unha gran trabe de carballo ou castiñeiro que esmaga o bago facendo presión normalmente cun parafuso fixo de madeira vertical que apoia nun pé de pedra e que atravesa a trabe. Véxase a foto da dereita en branco e negro.

Prensa de gaiola[editar | editar a fonte]

Una prensa de gaiola consiste nun canastro que se enche co bago para ser prensado. Aplícase presión tras dunha tampa que é obrigada a baixar sobre a froita. O mecanismo para baixar a tampa adoita ser un parafuso ou un aparello hidráulico. O zume flúe polos buratos da gaiola. A prensa de gaiola foi o primeiro tipo de prensa mecanizada que se desenvolveu, e o se deseño básico non cambiou en case 1.000 anos.[5]

Parafuso horizontal[editar | editar a fonte]

Unha prensa de parafuso horizontal funciona usando o mesmo principio que a prensa de gaiola. No canto de utilizar unha tampa para facer presión sobre o bago, achéganse dúas tampas colocadas nos dous extremos dun cilindro fechado para apertar as uvas. Xeralmente o volume de uvas utilizado é moito maior ca o volume procesado nunha prensa de gaiola.[6]

Prensa pneumática[editar | editar a fonte]

A prensa pneumática consiste nun cilindro grande, fechado en ambos os lados, no que fica a froita. Para prensarmos as uvas, un globo as estende e empurra. O zume flúe ao exterior polos buratiños do cilindro. O cilindro xira durante o proceso para axudar coa homoxeneización da presión aplicada ao bago.[7]

Parafuso continuo[editar | editar a fonte]

O parafuso continuo é distinto das prensas xa mencionadas porque non procesa un só lote de uvas á vez. No canto diso emprega un parafuso de Arquimedes para forzar o bago continuamente esmagándoo contra a parede do aparato. Extráese o zume e o bagazo continúa até o fin onde é extraído.[8] Este tipo de prensa non se utiliza moito para producir viño de mesa, e algúns países prohiben o seu uso nos viños de maior calidade.[9]

Galería de imaxes[editar | editar a fonte]

Notas[editar | editar a fonte]

  1. Definicións no Dicionario da Real Academia Galega e no Portal das Palabras para prensa.
  2. Sitio web de los Amigos del Vino Profesionales - Vino 101 (en inglés)
  3. "Archaeologists Unearth the World's Oldest Wine Press". TIME. 11 de xaneiro de 2011. http://newsfeed.time.com/2011/01/11/archaeologists-unearth-the-worlds-oldest-wine-press/. Consultado o 11 de xaneiro de 2011.
  4. Definicións no Dicionario da Real Academia Galega e no Portal das Palabras para lagar.
  5. David Bird, Understanding Wine Technology The Science of Wine Explained, p 47 ISBN 1-891267-91-4 (en inglés)
  6. Bird, p 49
  7. Dr. Yair Margalit, Winery Technology & Operations A Handbook for Small Wineries p42-43 ISBN 0-932664-66-0
  8. Margalit p 46
  9. Bird, p 52

Véxase tamén[editar | editar a fonte]

Outros artigos[editar | editar a fonte]