Praia dos Bloques
| Praia dos Bloques | |
|---|---|
 Vista do fondo da ría de Ribadeo dende o promontorio sobre a praia dos Bloques | |
| Coordenadas: 43°31′45″N 7°02′39″O / 43.529100000238, -7.044199999587 | |
| Características xerais | |
| Localización | Ribadeo |
| Lonxitude | 120 m |
| Largo medio | 25 m |
| Características específicas | |
| Composición | area fina |
A praia dos Bloques é unha praia de Ribadeo situada na ría homónima. Está no lugar da Vilavella, ao sur do porto de Mirasol e preto da vila de Ribadeo, cara ao interior da ría. Está resgardada por un esporón construído paralelo á costa que é, segundo Isidoro Asensio Amor, a causa de que se acumule limo no fondo e pareza ocupar toda a extensión da ría cando baixa a marea.
É unha praia portuaria semiurbana e de augas tranquilas, relativamente arredada dos circuítos turísticos habituais, polo que goza dun nivel de ocupación xeralmente baixo, ao que tamén contribúe a ausencia de servizos de hostelaría na contorna.
Dotada de area fina e dourada, ten unha lonxitude de 120 m e unha anchura media de 25 m. Conta con sinalización do estado do mar e papeleiras para a recollida do lixo. No verán dispón de servizo de salvamento, duchas e baños, mais non está recoñecida con bandeira azul. Ten tamén un pequeno aparcadoiro próximo e unha extensa zona de herba aos lados.