Publicidade no lugar de venda
A publicidade no lugar de venda (PLV) abrangue expositores, carteis, displays e outros elementos que sexan portadores dunha mensaxe publicitaria e estean colocados nun punto de venda. Tamén se coñece como «POS display», abreviatura da expresión en lingua inglesa Point of sale display.
Elementos de PLV e a compra por arroutada[editar | editar a fonte]
O seu principal obxectivo é favorecer a venda dos produtos publicitados, chamando a atención do cliente que se atopa dentro do establecemento comercial e, fundamentalmente, apelar a unha decisión «impulsiva» de compra. Un bo exemplo de PLV pode ser os pequenos mobles expositores localizados a carón das caixas dos supermercados, onde se colocan artigos de pequeno tamaño e prezo, para convidar á compra por arroutada. Mentres o cliente agarda na cola para pagar a súa compra, olla cara ó moble, lembra un artigo no derradeiro intre e decide mercalo.
Os elementos de PLV atópanse en todo tipo de establecementos, dende o comercio especializado (perfumaría, reloxaría, boutique, farmacia), até comercio en réxime de libre servizo como supermercados, hipermercados, grandes superficies especializadas (xoguetes, bricolaxe, mobles), grandes almacéns e tendas de conveniencia.
