Ovella negra

Na Galipedia, a Wikipedia en galego.

Ovella negra é un termo usado para clasificar algo ou alguén coma diferente, coma fóra dos patróns, estraño, raro, especial, nun sentido negativo.[1]

Como a meirande parte das ovellas son brancas e claras, cando hai unha alteración xenética e nace unha ovella negra, vese claramente que é diferente das demais. De aí sae esta expresión para clasificar os diferentes. Ademais a presenza indesexable e pouco común de individuos de la negra en rabaños de ovellas non era bo para o criador, pois a la de ditas ovellas non era cobizada no mercado como a branca.[1] En Inglaterra durante os séculos XVIII e XIX, a cor negra das ovellas era vista como unha marca do diabo.[2]

Se unha familia ten membros de conduta incorrupta, decente e honesta, e algún membro da familia sae irresponsábel, ladrón ou fóra dos patróns ditos normais para aquel grupo familiar de individuos, é de inmediato considerado a ovella negra da familia. Tamén a expresión se lle pode outorgar a un membro dun grupo que simplemente posúe características diferentes das dos seus compañeiros, sen o sentido negativo.[3]

Na psicoloxía, denomínase efecto da ovella negra a tendencia dun grupo de tratar ou avaliar un membro da súa propia sociedade dunha forma máis severa que o resto, baseándose nun comportamento negativo por parte do individuo.[4]

Na xenética das ovellas, ser brancas non é por albinismo senón por teren un alelo dominante branco no xene que determina a cor individuo. Pola súa parte, as ovellas negras teñen alelos recesivos, e se unha ovella branca e un carneiro branco teñen un año negro, ambos deben ser heterocigotos con respecto ao negro, e tiñan un 25% de posibilidades de que a cría fose negra. Un estudo recente realizado pola Universidade de Agricultura de Noruega e pola Universidade de Oregon determinou que a cor negra se xera por un alelo E D presente no momento da concepción.[5]

Notas[editar | editar a fonte]

  1. 1,0 1,1 "American Heritage Dictionary of Idioms" (en inglés). http://books.google.com/books?id=9re1vfFh04sC&pg=PA64&lpg=PA64&dq=american+heritage+dictionary+%22black+sheep%22&source=web&ots=JF-Bux9gXr&sig=rAsie-Mb4W-9vB3TZzSbIuVHKLE. Consultado o 29 de agosto de 2012. 
  2. Sykes, Christopher Simon (1983). Black Sheep. New York: Viking Press. p. 11. ISBN 0-670-17276-6. 
  3. The American Heritage Dictionary of Idioms. Houghton Mifflin Company. http://www.answers.com/topic/black-sheep. Consultado o 29 de agosto de 2012. 
  4. Black sheep effect Psychology Lexicon. Consultado o 29 de agosto de 2012.
  5. "Molecular and pharmacological characterization of dominant black coat color in sheep". Mammalian Genome (Springer New York) 10 (1): 39–43. Xaneiro de 1999. DOI:10.1007/s003359900939. ISSN 0938-8990. http://www.springerlink.com/content/h800bru487qmhtck/. Consultado o 29 de agosto de 2012.