Os Trasnos de Moscoso
| Os Trasnos de Moscoso | |
|---|---|
 | |
| Orixe | Moscoso,  |
| Período | 2003 - ? |
| Xénero(s) | Hip hop |
| Selo(s) discográfico(s) | A Regueifa Plataforma |
| Membros | Gordo, Malvares, Mon, Che |
| Na rede | |
| http://www.ostrasnosdemoscoso.com | |
   | |
Os Trasnos de Moscoso, é un grupo galego de hip hop.
Traxectoria[editar | editar a fonte]
Foi creado no ano 2003 por Malvares,[1] Gordo e Che, tres rapaces de Moscoso (Pazos de Borbén).[2]Na formación, os dous primeiros encargábanse das voces e Che actuaba como produtor musical. No ano 2004 debutan en directo e comezan a dar concertos pola provincia de Pontevedra. Nesa etapa úneselles Mon, un rapaz de Redondela que pasará a realizar o traballo de Dj. Con catro membros, o grupo configura o seu núcleo estábel, e xa a mediados do 2005 deixan os concertos para centrarse na gravación do seu primeiro traballo, que lles levou uns nove meses, cuns medios moi limitados.
En maio de 2006 sacan a súa primeira maqueta Denominación de orixe: Rap do país, ofrecida gratuitamente na súa páxina web. Nas voces colaborará Quinho, un rapaz con raíces en Moscoso pero criado no Brasil.
A partir dese momento volven a dar concertos por toda a Galiza. No outono do 2006 quedan terceiros no certame Gzcrea, feito que lles dá certa popularidade e posibilita que entren na Rede Galega de Música ao Vivo 2007, tocando en moitos locais por todo o país. Algúns meses despois o netlabel A Regueifa Plataforma reedita en formato dixital o seu traballo.
A actitude d'Os Trasnos de Moscoso como grupo de hip hop achégase á filosofía doutros grupos e colectivos contemporáneos, como Dios ke te crew. Algunhas das súas características son o compromiso co idioma, o cuestionamento do clásico espazo urbano do rap, e a renuncia a determinados tópicos da escena hip hop internacional. Tamén hai unha certa reivindicación da lingua popular fronte ás esixencias normativas.
Discografía[editar | editar a fonte]
- Denominación de orixe: Rap do país (A Regueifa Plataforma, 2006).
- A casa da Joaquina (2011).[3][4]
Notas[editar | editar a fonte]
- ↑ "MALVARES DE MOSCOSO (Vigo)". Vociferio (en castelán). Consultado o 16 de xullo de 2019.
- ↑ "OS TRASNOS DE MOSCOSO: "COMEZAMOS IMPROVISANDO CANDO ESTABAMOS DE BOTELLON"" (PDF). lingua.gal. Archived from the original on 16 de xullo de 2019. Consultado o 16 de xullo de 2019.
- ↑ "Os Trasnos de Moscoso presentan "Casa da Joaquina"". Galiciaflow (en castelán). Arquivado dende o orixinal o 16 de xullo de 2019. Consultado o 2019-07-16.
- ↑ "Os Trasnos de Moscoso". www.gzmusica.com. Consultado o 16 de xullo de 2019.
