Organización Avanzada para a Liberación de Saguia el Hamra e Río de Oro

Na Galipedia, a Wikipedia en galego.

A Organización Avanzada para a Liberación de Saguia el Hamra e Río de Oro (Harakat Tahrir en árabe) foi un movemento político nacionalista saharauí de carácter clandestino que xurdiu a partir de 1967 baixo o liderato de Mohamed Bassir.

Historia e características[editar | editar a fonte]

Bassir aglutinou nun primeiro momento a un pequeno número de seguidores localizados en Smara que de aí foise esparexendo polo norte e centro do territorio, e máis escasamente polo sur, ata chegar a un total aproximado de 5.000 militantes, boa parte deles formado por suboficiais e soldados da Agrupación de Tropas Nómades, policías, funcionarios e algunhas autoridades tradicionais.

Cando as autoridades gobernativas do Sahara español decidiron convocar unha manifestación para o 17 de xuño de 1970 en El Aaiún contra os comunicados de Tlemcén e Casabranca redactados tras as xuntanzas de Hassan II con Hari Boumédienne e Moktar Uld Dadah sobre o Sahara, a organización de Bassir decidiu convocar unha contramanifestación na barriada de Zemla coa intención de presionar para entrevistarse co gobernador, quen diante á negativa a sumarse á manifestación oficial ou disolverse enviou a lexión para disolvela, o que provocou unha masacre entre os manifestantes ao disparar os lexionarios contra da manifestación. Nos días seguintes detívose ao seu líder, Bassir, do que non se volveu saber máis e a organización deixou de actuar.

O movemento pretendía a consecución de xeito pacífico dunha autonomía para o Sahara Occidental que preparase o camiño cara a independencia do territorio. Tamén pretendía a supresión dos dirixentes tradicionais.