Nomenclátor de Galicia
O Nomenclátor de Galicia é un corpus toponímico desenvolvido pola Xunta de Galicia que regula os topónimos oficiais dos lugares, parroquias e concellos de Galiza. Publicouse en 2003.
Características[editar | editar a fonte]
O nomenclátor está editado pola Comisión de Toponimia da Xunta de Galicia e ten carácter legal canto á denominación das entidades de poboación. Pódese consultar a través de Internet. A súa páxina web ten un buscador on-line que permite utilizar expresións regulares na busca de secuencias gráficas, polo que permite, por exemplo, atopar tódolos topónimos rematados cunha secuencia determinada (en -iz, -obre, -ende ou -il) ou que comecen por unha cadea de texto concreto (por exemplo en Carball- ou en Vila-).
Malia ser un elemento normalizador e normativizador da toponimia galega, deixa fóra a posibilidade de consultar nel a toponimia galega dos concellos limítrofes á Nacionalidade Histórica de fala galega.
Historia[editar | editar a fonte]
En 1983 promulgouse a Lei de Normalización Lingüística, a cal estabeleceu que os topónimos habían ter como única forma oficial a galega. Posteriormente, fóronse publicando ordes que determinaban os nomes oficiais dos concellos. Finalmente, aprobáronse mediante decreto os nomenclátores das entidades de poboación das provincias de Ourense, Pontevedra, Lugo e A Coruña nos anos 1996, 1998, 2000 e 2003 respectivamente. Para cada provincia saíu do prelo o seu correspondente tomo, recolleitos xa nese 2003 nun único volume: o Nomenclátor de Galicia. Nel recompílanse 37.308 topónimos de lugares, máis ca todo Portugal[1] e có resto de España.[2]
Na obra advirtíase, no entanto, que non era un traballo fechado e que xa había suxestións para a revisión dalgunhas das formas oficializadas. En 2014 foran revisados tódolos nomes das provincias da Coruña e Lugo, de xeito que na primeira para uns 1000 topónimos verificados emitíranse uns 500 ditames cunha forma diferente, en canto na segunda para 885 ditamináranse 570.[1] En 2017 o novo nomenclátor estaba previsto para saír dentro dun ano, corrixido e aumentado até os 39.000 núcleos de poboación.[2]
Notas[editar | editar a fonte]
- ↑ 1,0 1,1 Villar, C. (19 de maio de 2014). "Los nombres en cuestión". La Opinión A Coruña (en castelán).
- ↑ 2,0 2,1 Montero, Tamara (10 de agosto de 2017). "Galicia trabaja contrarreloj para salvar dos millones de topónimos". La Voz de Galicia (en castelán).
Véxase tamén[editar | editar a fonte]
Bibliografía[editar | editar a fonte]
- Consellería da Presidencia e Administración Pública (2003). Nomenclátor de Galicia. Toponimia oficial das provincias, concellos, parroquias e lugares. Santiago de Compostela: Xunta de Galicia. ISBN 84-453-3601-0.
- ——— (29 de agosto de 1996). "Decreto 332/1996, do 26 de xullo, polo que se aproba o nomenclátor correspondente ás entidades de poboación da Provincia de Orense [sic]" (PDF). Diario Oficial de Galicia (Xunta de Galicia). Ano XV (169): 8066–8111.
- ——— (28 de xullo de 1998). "Decreto 219/1998, do 2 de xullo, polo que se aproba o nomenclátor correspondente ás entidades de poboación da provincia de Pontevedra" (PDF). Diario Oficial de Galicia (Xunta de Galicia). Ano XVII (144): 8541–8595.
- ——— (25 de xaneiro de 2000). "Decreto 6/2000, do 7 de xaneiro, polo que se aproba o nomenclátor correspondente ás entidades de poboación da provincia de Lugo" (PDF). Diario Oficial de Galicia (Xunta de Galicia). Ano XIX (16): 971–1020.
- ——— (25 de marzo de 2003). "Decreto 189/2003, do 6 de febreiro, polo que se aproba o nomenclátor correspondente ás entidades de poboación da provincia da Coruña". Diario Oficial de Galicia (Xunta de Galicia). Ano XXII (59): 3622–3655.
Ligazóns externas[editar | editar a fonte]
- Toponimia galega
- Buscador no Nomenclátor de Galiza (versión inicial, con máis de 37.300 topónimos)
- Buscador do Proxecto Toponimia de Galicia (versión cartográfica con máis de 350.000 topónimos)