Naftali Temu

Cadro de medallas
Atletismo masculino
Xogos Olímpicos
Ouro	México 1968	10.000 m
Bronce	México 1968	5.000 m

Naftali Temu (20 de abril de 1945-10 de marzo de 2003) foi un atleta queniano, que gañou o ouro olímpico e mailo bronce nas probas dos 10.000 e 5.000 metros nos Xogos Olímpicos de México.

Traxectoria

Nado no Distrito de Nyamira, Naftali Temu comezou a correr aos 14 anos de idade. Logo de rematar a súa etapa escolar uniuse á Armada Queniana.

Temu competiu nos Xogos Olímpicos de Toquio, finalizando no posto 49 na proba de maratón.

Nos Xogos Panafricanos de 1965 obtivo a medalla de prata nos 5.000 metros, o ouro foi para Kipchoge Keino. Apareceu na escena internacional das carreiras de fondo nos Xogos da Mancomunidade (en inglés Commonwealth Games) de 1966 en Kingston, Xamaica gañando a medalla de ouro e batendo ao posuidor do record mundial Ron Clarke nas 6 millas. Dous días despois Temu terminou cuarto nas 3 millas.

Nos Xogos Olímpicos de México, na final dos 10.000 metros, tan só o etíope Mamo Wolde puido aguantar o seu ritmo. Wolde foi sobrepasado por Temu a tan só 50 metros da meta facéndose este último co ouro olímpico.

Catro días despois, participou na final dos 5.000 metros, onde gañou a medalla de bronce, tan só batido de preto polo tunesino Mohammed Gammoudi e polo seu compatriota Kip Keino. Tamén participou na maratón, onde tivo outra grande batalla con Wolde, pero ao contrario que este último, despois de 30 km Temu estaba esgotado e só conseguiu finalizar no posto dezanove.

O resto da carreira deportiva de Temu foi pouco sobresaínte, non volveu acadar os primeiros postos en ningunha competición.

Retirouse en 1973. Morreu á idade de 57 anos dun cancro de próstata en Quenia. Naftali Temu non puido pagar os 600 dólares que requiría o seu tratamento médico.