Mosteiro de Santa María de Sobrado dos Monxes

Na Galipedia, a Wikipedia en galego.
(Redirixido desde "Mosteiro de Sobrado dos Monxes")

Coordenadas: 43°02′20″N 08°01′21″W / 43.03889°N 8.02250°W / 43.03889; -8.02250

Vista do mosteiro.

O mosteiro de Santa María de Sobrado dos Monxes é un mosteiro cisterciense situado no concello de Sobrado, na comarca da Terra de Melide.

Historia[editar | editar a fonte]

Posibelmente fundado no ano 952 nun primeiro momento (aparece citado en documentos de finais do século X co nome de "San Salvador"), pouco se sabe sobre os primeiros cento cincuenta anos da súa historia. A principios do século XII o mosteiro está abandonado.

Foi fundado de novo no ano 1142, cando San Bernardo envía desde Claraval (Francia), de onde é abade, unha comunidade de monxes. O 14 de febreiro de 1142, comeza en Santa María de Sobrado a vida monástica cisterciense. Durante o resto do século XII e o século XIII o mosteiro desenvolve unha grande actividade espiritual e económica. Desta fábrica consérvanse a capela funeraria da Magdalena, a sala capitular e algunhas partes soltas.

Coñece despois unha etapa de decadencia que se detén no ano 1498, ao incorporarse a Congregación de Castela. O mosteiro recupera parte da súa grandeza; a maioría dos edificios que actualmente se conservan, comezan a construírse a partir desta nova época. A monumental igrexa remátase a finais do século XVII e conságrase en 1708.

Santa María de Sobrado sofre unha nova etapa de decadencia, que culmina o 21 de setembro de 1834, cando coa desamortización, o Mosteiro queda suprimido por real orde. O Mosteiro de Santa María de Sobrado, os seus edificios e posesións foron vendidos. Iníciase un deterioro progresivo dos edificios que acaban converténdose en ruínas.

No ano 1954, por encargo do cardeal Quiroga Palacios, Arcebispo de Santiago, o Mosteiro Cisterciense de Viaceli, situado en Cóbreces (Cantabria) comeza a tarefa de reconstrución de Sobrado; e no mes de xullo de 1966 envía unha comunidade de monxes. O 25 de xullo de 1966, comeza de novo a vida monástica cisterciense no Mosteiro.

Arquitectura[editar | editar a fonte]

Facendo arco de entrada ao recinto do mosteiro atopamos a "Casa das Audiencias", chamada así por ser o lugar onde o abade do mosteiro exercía a súa xurisdicción sobre os seus súbitos.

O edificio principal distribúese en tres claustros:

Claustro dos Peregrinos

O de entrada ou dos peregrinos, porque é aquí onde son acollidos.

Claustro dos Medallóns

A seguir deste, o claustro dos medallóns, polos relevos colocados na parte superior. Neste momento acolle a hospedería.

Claustro da Comunidade

O claustro da comunidade, o máis grande de todos, reservado para a vida e actividade da comunidade de monxes.

Igrexa

Adosada ao edificio principal e con entrada perpendicular á do mosteiro atopamos a igrexa monacal, en estilo cistercience e con fachada barroca.

Galería de imaxes[editar | editar a fonte]

Véxase tamén[editar | editar a fonte]

Commons
Commons ten máis contidos multimedia na categoría: Mosteiro de Santa María de Sobrado dos Monxes

Outros artigos[editar | editar a fonte]

Ligazóns externas[editar | editar a fonte]