Merlo solitario

O merlo solitario ou merlo azul (Monticola solitarius) é unha especie de ave paseriforme da familia Turdidae que se caracteriza pola súa plumaxe azulada nos machos adultos.

Descrición

É unha ave duns 22 cm de lonxitude, algo máis grande có merlo rubio. A súa plumaxe é parda con motas claras na femia, e o macho presenta un rechamante ton azulado, máis escuro nas ás. O peteiro é escuro.

Distribución e hábitat

Distribúese polo sur de Europa e o noroeste de África, e dende Asia Central até o norte de China e de Malaisia. Habita en rocuedos, cantís e barrancos de orixe fluvial, podendo ocupar ocasionalmente construcións humanas. Os seus desprazamentos limítanse a cambios altitudinaisno inverno.

Comportamento

Ten un canto afrautado, que reproduce tanto parado como en voo, máis comunmente na época de celo. A súa posta é de 3 a 5 ovos. Aliméntase dunha gran variedade de insectos, ademais de bagas e outros vexetais.

Ameazas e conservación

Esta especie pode verse favorecida por varios factores, como os lumes, as canteiras e minas, que reducen a vexetación e aumentan a superficie de rocha dispoñible para construír os seus niños. Con todo, vese prexudicada por actividades como a presión urbanística sobre as zonas montañosas, a escalada preto dos seus niños, ou a creación de encoros, que alagan gorxas e canóns rochosos.