Meriadoc Brandigamo

Na Galipedia, a Wikipedia en galego.
Meriadoc Brandigamo
Personaxe de O Señor dos Aneis
Creador(es) J. R. R. Tolkien
Información
Alcume Merri
Raza Hobbits
Sexo Masculino
Nacemento 2982 T. I.
Falecemento +64 C. I.
Título Señor de Gamoedo
Familia Saradoc Brandigamo (pai)
Esmeralda Tuc (mai)
Cónxuxe Estella Bocho
Residencia Brandilar, Gamoedo
Perfil en IMDb

Meriadoc Brandigamo, normalmente coñecido como Merri, é un personaxe de ficción do legendarium de J. R. R. Tolkien, que aparece na súa obra máis famosa, O Señor dos Aneis.

Merri, un Hobbit, naceu no ano 2982 da Terceira Idade, e era o único fillo (e xa que logo o herdeiro aparente) de Saradoc Brandigamo (2940–11 C.I.), Señor de Gamoedo, e Esmeralda Tuc (2936–?), irmá máis nova de Paladin Tuc, o que o convertía en curmán do fillo de Paladin, Pipin[T 1], quen tamén era o seu amigo.

Amante dos barcos e mapas da Terra Media[T 2], descríbese a Merri como un dos máis íntimos amigos de Frodo, o protagonista principal do libro. Prímula, a irmá do avó de Merri, Rorimac Brandigamo, era a nai de Frodo, de xeito que este último era tío segundo de Merri[T 3].

Aparicións[editar | editar a fonte]

Literatura[editar | editar a fonte]

N' O Señor dos Aneis, Merri é considerado, e descrito por Tolkien, como o máis perceptivo e intelixente dos Hobbits: por exemplo, mesmo antes de que Bilbo Bulseiro abandonase a Comarca, el xa sabía da existencia do Anel Único e dos seus poderes de invisibilidade. Custodiou Vila Bulsa despois da festa de aniversario de Bilbo, protexendo a Frodo dos diversos e a miúdo indesexados convidados[T 4]. Tiña un ar astuto e un sentido do humor burlón tan inocente e ben intencionado que resultaba ímposíbel tomalo a mal (nunha ocasión, cando Lobelia Sacovila-Bulseiro acusa a Frodo de ser un Brandigamo e non un verdadeiro Bulseiro, Merri asegúralle de que "Foi un cumprido e por iso mesmo, xaora, falso")[T 5].

Merri tamén foi un dos artífices detrás da "Conspiración" xunto con Sam, Pipin, Fredegar Bocho (máis coñecido como "Gordiño") para axudar a Frodo[T 6]. Así, no comezo d' A Irmandade do Anel, Merri estaba ben preparado e organizado —fixo os fardos do grupo e trouxo ponis[T 7]. O seu atallo a través do Bosque Vello afastounos dos Xinetes Negros durante un tempo[T 8], mais tiveron que ser rescatados das poutas de Vello Home Salgueiro polo enigmático Tom Bombadil. Nas Lombas das Antas conseguiu a súa espada, que en realidade se trataba dunha daga longa forxada no reino de Arthedain[T 9].

En Valfendido (na imaxe) Merri estuda os mapas

Ao chegaren a Prebe, Merri non estaba na troula d'O Poni Rampante cando Frodo puxo o Anel; estaba fóra dando unha volta el só, e case cae baixo o influxo dun Nazgûl.[1][T 10] En Valfendido, descríbese como estuda mapas e traza o seu rumbo. Elrond admite con reticencia a Merri e a Pipin na Irmandade do Anel.[T 11]

Na entrada de Moria preguntoulle a Gandalf o significado da inscrición da porta, que rezaba "Di, amigo e entra". Cando Gandalf descubriu o seu verdadeiro sentido, díxolle a Merri "Merri, de todos nós, era o único que ía polo bo camiño"[T 12].

En Amon Hen foi capturado xunto con Pipin por unha banda dos Uruk-hai de Saruman, malia facerlles fronte, e foi defendido con valentía por Boromir[T 13]. Após escapar xunto a Pipin cara ao interior da fraga de Fangorn, Merri foi atopado por Bárbore. El e mais Pipin beberon unha considerábel cantidade da brebaxe dos Ents, e medraron malia teren xa a altura dun hobbit adulto[T 14]. Ambos acompañaron a Bárbore á Asemblent e máis tarde a Isengarda, onde se asentaron nunha garita da muralla. Foi aquí onde coñeceu ao Rei Théoden de Rohan, e onde se reuniu con catro dos membros restantes da Irmandade[T 15][2].

Separouse de Pipin cando este ollou no palantír e foi levado a Gondor por Gandalf. Merri xurou lealdade a Théoden e converteuse no seu escudeiro[T 16]. Sen o permiso do seu señor, cabalgou cara a Gondor xunto cunha disfrazada Éowyn[T 17]. Na Batalla dos Campos de Pelennor, mentres o Rei Bruxo pelexaba con Éowyn, Merri apuñalou o Nazgûl nunha sofraxe. A súa espada fora forxada polos Dúnedain de Arnor especialmente para combater os Nazgûl, polo que fixo que o espectro fose vulnerábel ás armas normais, permitindo a Éowyn rematalo. Isto fixo que se cumprise a antiga profecía (proferida por Glorfindel) de que o Rei Bruxo non morrería a mans dun Home (destruírono unha muller e mais un hobbit)[T 18]. Merri ouviu as derradeiras palabras de Théoden, mais, como adoitaba acontecer cos hobbits, a súa presenza non foi advertida pola escolta de honra dos Rohirrim, e foi atopado por Pipin vagando na cidade. Grazas ás habilidades curativas de Aragorn, salvouse e recuperouse por completo, antes que Éowyn[T 19].

Pola súa valentía na batalla, Merri foi nomeado polo Rei Éomer Cabaleiro da Marca[1]. Ao seu regreso á Comarca, liderou os hobbits na Batalla de Ribadauga, e matou persoalmente o xefe das forzas inimigas.

Trala Guerra do Anel, Merri e Pipin volveron para casa como os hobbits máis altos, e descubriron que Saruman se apoderara da Comarca. Merri e Pipin encabezaron a revolta que acontence durante a Limpeza da Comarca. Merry comandou as forzas dos hobbits e matou o líder dos "rufiáns" de Saruman na Batalla de Ribadauga.[1][T 20]. Máis tarde Merri casou con Estella Bocho, nalgún momento posterior á fin da Terceira Idade[T 21]. Herdou o título de Señor de Gamoedo no ano 11 da Cuarta Idade e converteuse en historiador da Comarca[T 22][T 23]. Á idade de 102 anos, volveu para Rohan e Gondor con Pipin, e morreu neste último reino ao redor do ano 64 C.I.. El e mais Pipin foron soterrados xunto cos Reis de Gondor en Rath Dínen, e máis tarde movéronse as súas tumbas para xaceren ao carón de Aragorn. O fillo de Merri sucedeuno como Señor de Gamoedo[T 24].

Armas e vestimenta[editar | editar a fonte]

Merri non levaba armas (agás por un pequeno coitelo de peto) até o seu encontro cos espectros das Lombas das Antas. Alí os Hobbits atoparon varias dagas longas Dúnedain entre o tesouro da aparición, que lles servían de espadas curtas[T 25]. Merri usou a súa para apuñalar o Rei Bruxo na sofraxe na Batalla dos Campos de Pelennor. Ao facelo a daga ficou destruída, como lle ocorría a todo gume que tocaba a carne do líder dos Nazgûl. A folla fora enfeitizada polo un armeiro anónimo de Arnor que a forxou de maneira que resultase mortal para o Rei Bruxo. Disque foi este poder o que destruíu ao Nazgûl[T 18].

Ao comezo d'A Irmandade do Anel, Merri vestía como o típico Hobbit: pantalón curto até o xeonllo, chaqueta, chaleco e capa. Após o asalto sufrido nas Lombas das Antas, perdeu as súas lixeiras roupas de verán e viuse obrigado a levar pesadas roupas de la até chegar a Valfendido[T 26]. En Lórien, recibiu unha capa élfica que outorgaba ao seu portador a capacidade de se camuflar coa súa contorna[T 27]. Merri ofreceu os seus servizos a Théoden, Rei de Rohan, e foi equipado cunha cota de malla, un helmo de coiro lixeiro e un pequeno escudo verde co emblema do cabalo branco[T 16]. Ao volver para a Comarca, dise que Merri levaba capa, cota de malla e un escudo cun fermoso emblema[T 28]. Máis tarde el e o seu amigo Peregrin Tuc adoitaban levar esta vestimenta máis formal, á diferenza de Frodo e Sam, que "volveron vestir de xeito normal"[T 29].

Adaptacións[editar | editar a fonte]

Dominic Monaghan, o actor que interpretou a Merri nos filmes de Peter Jackon

No filme animado de Ralph Bakshi de 1978 d' O Señor dos Aneis, a voz de Merri pertencía a Simon Chandler[3].

Na versión animada d' O Regreso do Rei de 1980 producida para televisión, a voz foi prestada pola personalidade radiofónica Casey Kasem, tamén coñecido por achegar a voz do personaxe Shaggy en Scooby-Doo[4].

No serial radiofónico d' O Señor dos Aneis gravado en 1981 pola BBC, Merri foi interpretado por Richard O'Callaghan[5].

Sergey Shelgunov actuou no papel de Merri para a obra teatral rusa televisada de 1991 titulada Khraniteli,[6] e Jarmo Hyttinen foi o intérprete elixido para a miniserie finesa de 1993 Hobitit.[7]

Na triloxía cinematográfica de Peter Jackson o papel de Merri recaeu en Dominic Monaghan[8].

No musical teatral de tres horas de duración d' O Señor dos Aneis estreado en Toronto en 2006, Dylan Roberts foi o encargado de lle dar vida. Na produción teatral londiniense de 2007/2008 Merri foi interpretado por Richard Henders, substituído por Ben Evans o 23 de xuño de 2008.

David Hyden interpretou a Merri na produción de Cincinnati d' O Regreso do Rei (2003) como parte de Clear Stage Cincinnati. No Lifeline Theatre de Chicago, Merri foi interpretado por Heath Corson n' As Dúas Torres (1998).

Notas[editar | editar a fonte]

  1. ↑ Tolkien 1955, Apéndice C, "Family Trees"
  2. ↑ Tolkien 1954a, libro 2, cap. 3 "O Anel vai cara ó sur"
  3. ↑ Tolkien 1955, Apéndice C, "Family Trees"
  4. ↑ Tolkien 1954a, libro 1, cap. 1 "Unha reunión moi esperada"
  5. ↑ Tolkien 1954a, libro 1, cap. 1 "Unha reunión moi esperada"
  6. ↑ Tolkien 1954a, libro 1, cap. 5 "Conspiración desenmascarada"
  7. ↑ Tolkien 1954a, libro 1, cap. 4 "Un atallo para ir ós cogomelos"
  8. ↑ Tolkien 1954a, libro 1, cap. 6 "O bosque vello"
  9. ↑ Tolkien 1954a, libro 1, cap. 8 "Néboa nas lombas das Antas"
  10. ↑ Tolkien 1954a, libro 1, cap. 10 "Alancadas"
  11. ↑ Tolkien 1954a, libro 2, cap. 3 "O Anel vai cara ó sur"
  12. ↑ Tolkien 1954a, libro 2, cap. 4 "Unha viaxe na escuridade"
  13. ↑ Tolkien 1954, libro 3, cap. 3 "O Uruk-Hai"
  14. ↑ Tolkien 1954, libro 3, cap. 4 "Bárbore"
  15. ↑ Tolkien 1954, libro 3, cap. 8 "O camiño de Isengarda"
  16. ↑ 16,0 16,1 Tolkien 1954, libro 5, cap. 2 "O paso da compañía gris"
  17. ↑ Tolkien 1954a, libro 5, cap. 3 "A concentración de Rohan"
  18. ↑ 18,0 18,1 Tolkien 1954a, libro 5, cap. 6 "A batalla dos campos de Pelennor"
  19. ↑ Tolkien 1954a, book 5, cap. 8 "As casas da saúde"
  20. ↑ Tolkien 1954a, libro 6 cap. 8 "Limpando a Comarca"
  21. ↑ Tolkien 1955, Apéndice C, "Bolger of Budgeford"
  22. ↑ Tolkien 1954a, Prólogo, "Nota sobre os arquivos da Comarca"
  23. ↑ Tolkien 1954, libro 3, cap. 9 "Refugallos e Reboutallos"
  24. ↑ Tolkien 1955, Apéndice B, "Later Events Concerning the Members of the Fellowship of the Ring," entrada de 1484
  25. ↑ Tolkien 1954a, libro 1, cap. 8 "Néboa nas lombas das Antas"
  26. ↑ Tolkien 1954a, libro 1, cap. 8 "Néboa nas lombas das Antas"
  27. ↑ Tolkien 1954a, libro 2, cap. 8 "Adeus a Lórien"
  28. ↑ Tolkien 1954a, libro 6 cap. 7 "De camiño a casa"
  29. ↑ Tolkien 1954a, libro 6 cap. 9 "Os portos grises"
Referencias
  1. ↑ 1,0 1,1 1,2 Croft 2006, pp. 419–420.
  2. ↑ Croft 2006, pp. 511-512.
  3. ↑ Canby, Vincent (1978). "The Lord of the Rings". The New York Times. 
  4. ↑ Day, Patrick Kevin (16 June 2014). "Shaggy, Merry and more: Casey Kasem's greatest cartoon voices". Los Angeles Times. Consultado o 25 May 2020. 
  5. ↑ "Riel Radio Theatre — The Lord of the Rings, Episode 2". Radioriel. 15 January 2009. Arquivado dende o orixinal o 15 de xaneiro de 2020. Consultado o 25 May 2020. 
  6. ↑ Vasilieva, Anna (31 March 2021). "«Хранители» и «Властелин Колец»: кто исполнил роли в культовых экранизациях РФ и США" ["Keepers" and "The Lord of the Rings": who played the roles in the cult film adaptations of the Russian Federation and the USA] (en Russian). 5 TV. Consultado o 6 April 2021. 
  7. ↑ Robb, Brian J.; Simpson, Paul (2013). Middle-earth Envisioned: The Hobbit and The Lord of the Rings: On Screen, On Stage, and Beyond. Race Point Publishing. p. 66. ISBN 978-1-937994-27-3. 
  8. ↑ Ebert, Roger (2004). Roger Ebert's Movie Yearbook 2005. Andrews McMeel Publishing. p. 395. ISBN 978-0-7407-4742-7. 
Traído desde «https://gl.wikipedia.org/w/index.php?title=Meriadoc_Brandigamo&oldid=6253176»