Mecenas

Na Galipedia, a Wikipedia en galego.

Caius Cilnius Maecenas nado en Arezzo, probablemente no 69 a.C. e falecido probablemente no ano 8 da nosa era, foi un estadista romano e patrono das letras.

Mecenas descía dunha familia etrusca antiga e nobre. Foi conselleiro, colaborador e amigo de Octavio Augusto, a quen mesmo substituiu durante as súas ausencias de Italia. Posteriormente a relación arrefriou, posibelmente porque Augusto tivo un affaire coa muller de Mecenas, Terencia, mais no seu testamento designouno único herdeiro. Actuou como mediador nos tratados de Brindisi (40 a.C.) e Taranto (37 a.C.).

Mecenas foi unha figura chave na vida literaria da época augusta. Animou a súa política cultural, ao protexer e dirixir os creadores de máis prestixio, como Virxilio (quen lle dedicou as Xeórxicas), Horacio (a quen lle regalou Vila Sabina), Propercio, Varius Rufus, Plotius Tucca, Valgius Rufus ou Domitius Marsus.

É autor de obras en prosa (Prometeo, Simposio, In Octaviam, De cultu suo) e en verso, das que se conservan uns vinte fragmentos.

Legado[editar | editar a fonte]

O seu nome é símbolo do patronato rico e xeneroso das artes. Os termos galegos mecenas e mecenado proveñen do seu nome.

Galizionario
Vexa a entrada do Galizionario acerca de mecenas