Luís Seoane
- Para outras páxinas con títulos homónimos véxase: Seoane.
| Luís Seoane López | |
|---|---|
 |
|
| Nacemento | 1 de xuño, 1910 |
| Lugar de nacemento | Bos Aires,  Arxentina |
| Morte | 5 de abril, 1979 |
| Lugar de morte | A Coruña,  Galicia |
| Nacionalidade | Española  |
| Eido | Pintura, gravado |
| Movemento | Expresionismo |
Luís Seoane López, nado en Bos Aires o 1 de xuño de 1910 e finado na Coruña o 5 de abril de 1979, foi un editor, escritor, xornalista, gravador e pintor galego.
Índice |
[editar] Traxectoria
Nado en Bos Aires no ano 1910, fillo de emigrantes, veu de neno en 1916 a Galicia e instálase na Coruña.[1] Fixo o bacharelato na Coruña e Dereito en Santiago de Compostela, onde participou na actividade política e cultural estudantil. Sendo aínda estudante universitario demostrou a súa vocación artística ilustrando libros e publicando debuxos en revistas e xornais.
De 1931 a 1936 exerceu de avogado laboralista na Coruña e foi membro do Partido Galeguista, así como da Masonería. Durante esta época participou na campaña en prol do Estatuto de Autonomía. Tras a sublevación do 18 de xullo de 1936 mantívose agochado durante uns meses ata que en setembro de 1936 puido exiliarse a Bos Aires vía Lisboa. Alí fixou a súa residencia e traballou no consulado republicano.
En 1937 publica o seu primeiro libro, Trece estampas de la traición.
Foi o promotor de moitas empresas culturais, da emigración e do interior (revistas como Galicia Libre, Galicia Emigrante ou Cuco-Rei, a imprenta Resol en Santiago de Compostela xunto a Arturo Cuadrado; editoriais como Editorial Citania, Editorial Botella al Mar e outras; o Laboratorio de Formas de Galicia, xunto a Isaac Díaz Pardo, do que nacerá o complexo de Sargadelos, etc.). Non deixou nunca de afrontar proxectos e participar activamente na recuperación da cultura galega.[1]
Regresou a España en 1960. Nas últimas décadas da súa vida, alternou a residencia en América con viaxes a Galicia. Morreu na Coruña en 1979.
[editar] Obra pictórica
A súa obra como artista gráfico foi importantísima: debuxante, gravador, deseñador de libros e de obxectos cerámicos, cartelista, pintor... Luís Seoane é un dos máis grandes plásticos galegos de tódolos tempos, e sen dúbida o máis completo e coñecido. A súa obra é tan extensa como o foron as súas inquedanzas artísticas e intelectuais. A súa obra pictórica reflicte ese amor a Galicia e a súa ansia por recuperar paisaxes, símbolos e personaxes galegos para facelos universais.
A súa obra, de tendencia expresionista e cercana á abstracción, foi exposta en lugares como Bos Aires, Montevideo, Londres, Nova York, Venecia, México, Bruxelas ou Hamburgo.
[editar] Obra escrita
Publicou numerosos estudos e ensaios de arte, obras de teatro, crónicas radiofónicas, etc.
Tamén se adicou á poesía e no 1977 Edicións do Castro publicou a súa obra poética completa.
Dedicóuselle o Día das Letras Galegas en 1994
[editar] Obra en galego
[editar] Poesía
- Fardel d'eisilado (Bos Aires, Ediciós Anxel Casal, 1952)
- Na brétema, Sant-Yago (Bos Aires, Ediciones Botella al Mar, 1956)
- As cicatrices (Bos Aires, Editorial Citania, 1959)
- A maior abondamento (1972)
[editar] Narrativa
- Tres follas de ruda e un allo verde (inédito). Publicado en tradución castelá: Tres hojas de ruda y un ajo verde (Bos Aires, Ediciones Botella al Mar, 1948)
[editar] Teatro
- A soldadeira (inédita). Publicada en tradución castelá: La soldadera (Bos Aires, Editorial Ariadna, 1957)
[editar] Ensaio
- Eiroa (Vigo, Galaxia, 1957)
- Castelao artista (Bos Aires, Alborada, 1969)
- Textos sobre arte galega e deseño (Vigo, A Nosa Terra)
- Luís Seoane. Teórico do deseño gráfico (Museo do Pobo Galego, 2010. Edición de Xosé Ramón Fandiño e Gloria López). Escolma de artigos sobre o deseño gráfico.
[editar] Gravados e debuxos con textos literarios
- Homaxe a un paxaro (A Coruña, Edicións do Castro, 1969).
- Retratos de esguello (A Coruña, Edicións do Castro, 1968).
- O meco (A Coruña, Edicións do Castro, 1963).
- O conde asesino de Sobrado (A Coruña-Bos Aires, Ediciós Cuco-Rei, 1971).
- Comunicacións mesturadas (Vigo, Editorial Galaxia, 1973).
- Figuraciós (A Coruña, Deputación da Coruña, 1990). Edición de Lino Braxe e Xavier Seoane.
[editar] Obra en castelán
- 13 Estampas de la traición, Bos Aires, edición de autor, (1937)
- Homenaje a la Torre de Hércules, (1945), obra galardoada en Nova York xunto a Histoire Naturelle de Buffon que estaba ilustrada por Pablo Picasso [1]
[editar] 2010: Ano Seoane
En 2010, conmemorouse o primeiro centenario do nacemento do intelectual galego.
[editar] Notas
[editar] Véxase tamén
[editar] Bibliografía
- María América Díaz (2004), Luís Seoane. Notas ás súas cartas a Díaz Pardo 1957-1979, Sada: Edicións do Castro. ISBN 84-8485-141-9.
[editar] Ligazóns externas
| Predecesor: Eduardo Blanco Amor |
Día das Letras Galegas 1994 Luís Seoane |
Sucesor: Rafael Dieste |
|
||||||||
