Louro, Muros

Louro
Convento de San Francisco
Concello	Muros
Área	- km²
Poboación	(Ano 2004) 1.297 hab.
Densidade	- hab./km²
Entidades de poboación	13

Santiago de Louro é unha parroquia situada ao sur do concello de Muros. Segundo o padrón municipal de 2004 tiña 1.297 habitantes (672 homes e 625 mulleres) distribuídos en 5 entidades de poboación, o que supón unha diminución en relación ao ano 1999 cando contaba con 1.320 habitantes.

Situación

Esta parroquia representa o límite natural entre a máis setentrional das rías Baixas, a ría de Muros e Noia, e a costa aberta que dá paso ao cabo Fisterra e á costa da Morte, límite que ven marcado polo monte Louro.

Patrimonio

O primeiro vestixio humano atopado na parroquia é o petróglifo da Laxe das Rodas, en fase de recuperación e consolidación.

O convento de San Francisco de Louro, tamén coñecido como de San Francisco do Rial, sitúase ao pé do monte Oroso. Foi fundado como crematorio en 1223, e sobre el levantouse unha capela románica dedicada a Santa Mónica do Rial, pasando a ser convento en 1432. En 1835 foi abandonado trala desamortización de Mendizábal, pero en 1873 foi ocupado de novo e restaurado por frades franciscanos.

A igrexa do mesmo é de estilo gótico. O claustro, segundo unha inscrición dun dos seus lenzos, data de 1646. O atrio do conxunto está cercado por un muro no que se adosa unha fonte e está centrado por un cruceiro. Desde o mosteiro ascende polo monte Calvario un Via Crucis con quince estacións, nas que se relatan escenas da Paixón de Cristo, construído en 1877 cos donativos dos fieis.

Economía

Historicamente foi unha parroquia rural, na que as actividades produtivas mais relevantes foron a pesca e o agro, dentro do que destacaba unha importante cabana ovina. Restos deste pasado son os muíños do río Longarela, algúns deles en bo estado de conservación, ou algunhas agrupacións de cabaceiras (os hórreos, construídos co estilo particular da comarca) de grande interese. Tamén contou con unha florecente industria conserveira, da que se conservan varios edificios ao longo do seu litoral, algúns deles admirábeis pezas, aínda en bo estado, da historia industrial galega. Algúns destes vellos edificios foron reconvertidos en locais de hostalería, o que permite gozar da súa grande beleza e interese arquitectónicos.

Hoxe en día perdeuse unha grande parte desta actividade aínda que perdura a extracción marisqueira e o mergullo con certa relevancia, así como a agricultura de carácter doméstico.

A economía louradán xira na actualidade entorno ao turismo estival principalmente, e tamén conta con varios restaurantes e bares de copas que manteñen a actividade durante todo o ano.

A riqueza paisaxística é un dos seus grandes activos, xa que combina ría, mar aberto, monte e praia. Ademais, para quen guste da ornitoloxía, conta coa lagoa de Xalfas, ao pé de Monte Louro, na que se poden contemplar diversas especies durante grande parte do ano. Adxacente á lagoa e separada desta por unha barreira de dunas, está a praia de Area Maior, enorme areal apto para a práctica do nudismo en harmonía co resto de visitantes, debido á súa grande extensión que permanece case que deserta, incluso durante o verán.

Galería de imaxes

Artigo principal: Galería de imaxes de Louro, Muros.

• 

  Lagoa das Xerfas

• 

  Convento de San Francisco.

• 

  imaxe de Francisco Asís a carón do convento.

• 

  LIC do monte Louro e a lagoa de Louro.

• 

  Laxe das Rodas.

• 

  Laxe das Rodas.

• 

  Nasas na praia de Louro

Véxase tamén

Outros artigos

• Lugares de Muros