Levallois-Perret

Na Galipedia, a Wikipedia en galego.
Localización de Levallois-Perret.
Escudo do concello.
Rúa de Levallois-Perret.

Levallois-Perret (pronuncia francesa [lə.va.lwa.pɛ.ʁɛ] (AFI)) é un concello situado no departamento de Altos do Sena, ao noroeste de París, en Francia. Nos seus 2,42 km² habitan 62.500 habitantes (2005), o que fai que con 25.826 hab./km² ocupe o primeiro posto en densidade de poboación dos concellos de Francia, con todo o dato debe ser relativizado xa que o concello forma parte da aglomeración de París onde esas densidades non son raras.


Historia[editar | editar a fonte]

No territorio do concello identificáronse restos prehistóricos a fins do século XIX que deron nome a unha técnica de talla lítica empregada na prehistoria, a Técnica Levallois.

No territorio do que hoxe é o concello de Levallois-Perret existía a vila de Villiers e a aldea de Courcelles que pertencían ao concello de Clichy mentres o suroeste pertencía ao concello de Neuilly-sur-Seine. O concello debe o seu nome a Nicolas Eugène Levallois e Jean-Jacques Perret. En 1822 Perret urbanizou unha parte das súas propiedades, nacendo Champ-Perret. Anos despois outro gran propietario confía a Levallois para que organice a urbanización de parte dos seus terreos, a vila de Levallois nace oficialmente o 27 de setembro de 1845, aínda que a vila non estará concluída ata anos despois, e o 1 de xaneiro de 1867 créase o concello de Levallois-Perret.