La Monumental

Na Galipedia, a Wikipedia en galego.
La Monumental na actualidade

La Monumental é unha praza de touros da cidade de Barcelona, situada no barrio do Fort Pienc. Inaugurada en 1914 co nome de El Sport, foi rebautizada en 1916 co seu nome actual. A última corrida de touros que se celebrou foi o 25 de setembro de 2011, que foi tamén a última en Cataluña, logo da abolición dos espectáculos taurinos por parte do Parlament o 28 de xullo de 2010.

O edificio de 1914, obra de Joaquim Raspall, tiña unha fachada de estilo noucentista e posteriormente encargouse a Ignasi Mas i Morell, en colaboración con Domènec Sugranyes, engadir unha coroa exterior acabada en 1916, que é a fachada que actualmente existe, de estilo mudéxar e bizantino.

A praza ten capacidade para 19.582 espectadores. Foi a última praza de touros de Barcelona onde se celebraron corridas, logo da desaparición das prazas de El Torín e Les Arenes. Actualmente, a Monumental é escenario de actos musicais e espectáculos de circo.