Kiwi (froita)

Na Galipedia, a Wikipedia en galego.

Este artigo trata sobre a froita, para máis información sobre a planta véxase: kiwi (planta).

Kiwi (Actinidia chinensis) 1 Luc Viatour.jpg

O kiwi é a froita da planta do mesmo nome (Actinidia deliciosa) que medra en climas temperados. Debe o seu nome a unha remota similitude de aspecto entre o froito de orixe chinesa e a ave neozelandesa chamada kiwi. O froito cuberto de micropelos pode evocar a curiosa e típica plumaxe desta ave.

Cabe salientar que o cultivo do kiwi aclimatouse moi ben na Galiza e é unha froita que raramente precisa de produtos contra pragas ou fitosanitarios, polo que pode cultivarse de maneira ecolóxica facilmente.(Para cultivo véxase artigo kiwi (planta).)

Clasifícase botanicamente coma unha baga oval duns 6,25 cm de longo, coa pela magra de cor verde acastañada e densamente cuberta duns peliños rexos e curtos de cor marrón. A polpa, firme até madurar completamente, é normalmente de cor verde brillante zumarenta e con diminutas sementes negras dispostas arredor dun cor abrancazado. Tamén hai variedades de kiwi coa polpa de cor alaranxada.

Ten un sabor subacedo a bastante acedo, semellante ao da grosella ou do amorodo.


Soe ser un alérxeno frecuente, especialmente a pela.

A maduración da froita en Galiza dáse a principios de abril.

Produción[editar | editar a fonte]

En España cultívanse unhas 1.200 ha, cunha produción de 25.700 Tm. A produción en Galiza é de 22.000 Tm. Tamén hai algunhas plantacións en Asturias, o País Vasco, Navarra, Cataluña e a Comunidade Valenciana. Consumo kiwi en España: 151.849 Tm (Importacións: 124.000 Tm; exportacións: 11.400 Tm.)[1]

Para máis información sobre a produción do kiwi, véxase artigo Kiwi (planta).

Conservación do froito[editar | editar a fonte]

Para a conservación industrial dos froitos en estado fresco, requírese sometelos a unha temperatura de 0 °C, con humidade relativa de 90-95 %, suplementadas con atmosferas controladas ou outras tecnoloxías.[2][3] O 1-metilciclopropeno favorece a conservación da firmeza do froito, xa for que o tratamento se realice antes da introdución en cámara fría, xa for que se efectúe durante o período de conservación.[4] Isto débese a que o kiwi é moi sensíbel á presenza de etileno, e o 1-metilciclopropeno inhibe a percepción do etileno por parte do froito.[5]

En cámara fría, a vida destes froitos pode durar entre 3 e 5 meses,[3] dependendo das variedades cultivadas. En caso de utilización das atmosferas controladas, recoméndanse niveis de osíxeno de 1-2 % e niveis de CO2 de 3-5 %.[2][3]

Información nutricional[editar | editar a fonte]

O kiwi é unha froita considerada cun alto aporte de vitamina C (Cabe salientar que o kiwi é a froita con mais vitamina C do mundo) e E. É baixa en colesterol. Produce efectos anticanceríxenos, ten capacidade antioxidante e antiinflamatoria, mellora o sistema inmunolóxico e aumenta as defensas en no organismo. Aporta outros nutrientes esenciais para o organismo coma fosfato, magnesio e cobre.

Cada 100 gramos aporta soamente 46 quilocalorías; 1 gr de proteínas; 0,6 g de graxas; 8,5 g de carbohidratos; 3,2 g de fibra; 40 mg de calcio; 31 mg de fósforo; 0,5 mg de ferro; 4 mg de sodio; 370 mg de caroteno e vitaminas (B1: 17 mg; B2: 50 mg; B3: 410 mg; B6: 120 mg; C: 70 mg; E: 930 mg); 295 mg de potasio; 330 mg de iodo; e 15 mg de magnesio.

A luteína é un composto fitoquímico que reduce o risco de cancro, enfermidades cardíacas e dexeneración macular e cataratas, ambas causas importantes de cegueira. Ademais, o kiwi contén moita fibra solúbel(diabetes, trastornos cardíacos) e insolúbel (cancro de colon, estrinximento e diverticulite). O cobre é vital para o crecemento dos nenos, fortalece os ósos e fai desenvolver o cerebro e o sistema inmunitario. Ten máis potasio que a banana e controla a presión sanguínea, controla a actividade do corazón e mantén o equilibrio dos fluídos.[6]

Galería de imaxes[editar | editar a fonte]

Notas[editar | editar a fonte]

  1. Presentación sobre o cultivo do kiwi - http://www.fundacionruralcaja.es/es/pdf/curso-cultivos-alternativos-y-control-calidad/cultivo-kiwi-granado/cultivo-kiwi-granado.pdf
  2. 2,0 2,1 Postharvest Technology of Horticultural Crops (3ª ed.). Oakland, California: Kader, Adel A.. 2002. p. 515. ISBN 1-879906-51-1.
  3. 3,0 3,1 3,2 Árboles frutales. Ecofisiología, cultivo y aprovechamiento. p. 780. ISBN 950-29-0974-7.
  4. Boquete, E.J.; Trinchero, G. D.; Fraschina, A. A.; Vilella, F.; Sozzi, G. O. (abril 2004). Ripening of 'Hayward' kiwifruit treated with 1-methylcyclopropene after cold storage. 32. pp. 57–65.
  5. Ilina, N.; Alem, H., Pagano, E.; Sozzi, G. O. (2010). Suppression of ethylene perception after exposure to cooling conditions delays the progress of softening in 'Hayward' kiwifruit. 55. pp. 160–168.
  6. Kiwi (froita) en Plantas útiles

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]