Johnny Weissmüller

Na Galipedia, a Wikipedia en galego.
Johnny Weissmüller
Weissmuller.jpg
Información persoal
Nacionalidade Estados Unidos de América Estados Unidos
Nacemento 2 de xuño de 1904
Freidorf, Reino de Hungría
Falecemento 20 de xaneiro de 1984
Acapulco, Guerrero
Deporte
País Estados Unidos de América Estados Unidos
Deporte Natación
Cadro de medallas
Competindo para Estados Unidos de América Estados Unidos:
Xogos Olímpicos
Ouro París 1924 100 m estilo libre
Ouro París 1924 400 m estilo libre
Ouro París 1924 4 x 200 m estilo libre
Bronce París 1924 Waterpolo
Ouro Ámsterdan 1928 100 m estilo libre
Ouro Ámsterdan 1928 4 x 200 m estilo libre

Peter Johann Weißmüller, coñecido como Johnny Weissmüller, nado en Freidorf (entón no Imperio Austro-Húngaro) o 2 de xuño de 1904 e finado en Acapulco (México) o 20 de xaneiro de 1984, foi un nadador e actor estadounidense.

Traxectoria[editar | editar a fonte]

Nado na Romanía no seo dunha familia de orixe xudía-asquenací, moi axiña a súa familia emigraría a Windber, EEUU, onde máis adiante conseguiría a nacionalidade norteamericana.

Excelente nadador, comezou a súa práctica deportiva con 15 anos, sendo naquela época o seu adestrador Big Bill Bagrach. Axiña destacou como gran nadador, chegando o 9 de xullo de 1922 a bater a marca do mundo dos 100 m libres cun tempo de 58,6 segundos, baixando así por primeira vez do minuto, e dos 400 libres con 4 minutos e 57 segundos no ano 1923, baixando dos cinco minutos. Participa nos Xogos Olímpicos de París 1924 e Xogos Olímpicos de Amsterdam 1928 e conseguiu un total de cinco medallas de ouro en 100 e 400 m libres e 4 x 200 nos de e 100 m e 4 x 200 respectivamente, batendo novamente as súas propias marcas. Será precisamente nos Xogos Olímpicos de París 1924 onde ademais participou no torneo de waterpolo conseguindo a medalla de bronce. En toda a súa carreira alcanzou 52 veces o posto de campión de Estados Unidos, e 67 marcas mundiais.

Tarzán[editar | editar a fonte]

Axiña a Metro-Goldwyn-Mayer interésase nel para interpretar o personaxe de Tarzán no cine. A primeira película foi Tarzan the Ape Man (1932), adaptación da novela de Edgar Rice Burroughs, á que seguirían vinte e tres máis, entre elas Tarzan and His Mate (1934), Tarzan Escapes (1936), Tarzan Finds a Son! (1939), Tarzan's Secret Treasure (1941), Tarzan's New York Adventure (1942) e Tarzan and the Mermaids (1948). Tamén foi protagonista, dende 1948, da serie para televisión Jungle Jim.

Chegou a contraer matrimonio un total de cinco veces: coa cantante Bobby Arnst, coa actriz Lupe Vélez e con Beryel Scott Ginter, Allenne Gates e Maria Brock Mandel. Tras dous derrames cerebrais entre 1976 e 1978, estableceu a súa residencia definitiva en Acapulco, onde logo de diversas desavenencias morreu á idade de 79 anos.