Ishupitta

Ishupitta foi unha cidade hitita do nordeste do Imperio, na Terra Alta Hitita, ocupada polos kaskas no século –XIV. Foi un dos teatros da última campaña do rei hitita Suppiluliumas I pouco tempo antes da súa morte sobre o -1325/-1320.

Historia

Mursilis II na súa primeira campaña o segundo ano de reinado, cando volvía a Hattusa pasou preto de Ishupitta, onde os kaska da rexión negáronse a achegar os continxentes aos que estaban obrigados polos acordos cos hititas (continxentes que eran utilizados para loitar contra outros kaskas non sometidos) e o rei atacou a cidade e obrigounos, queimando unha das súas cidades na zona; pero pouco despois de saír o rei da zona, Ishupitta volvía a se rebelar. No terceiro ano de reinado, na segunda campaña, volveu á zona e derrotou outra vez aos kaska, pero os líderes da revolta, Pazzanna e Nunnuta, que ata había poucos anos foran vasalos dos hititas, puideron fuxir, e dirixíronse a Palhwisa (Palhwišša) onde serán derrotados.

No cuarto ano de reinado de Mursilis III, ao principio da súa terceira campaña, (que despois foi contra Arzawa), o rei loitou outra vez; nesta zona a cidade kaska de Pishuru acadara a hexemonía e reconstruíra a cidade de Palhwisa que Mursilis incendiara o ano antes, e o rei hitita incendiouna por segunda vez; os kaskas ocuparon entón a cidade de Kuzastarina, que Mursilis atacou e reconquistou; entón fixo un forte avance ata a cidade de Anziliya e conquistou os territorios das inmediacións.

Baixo Muwatallis II a cidade foi dominada polos kaskas, os cales se apoderaron entón das terras de Landa, Marista e algunhas cidades fortificadas dos hititas; os hititas non os puideron conter e os kaskas continuaron avanzando cara ao sur cruzando o río Marasanda ou Maraššanda e chegando ata a terra de Kanis (Kanesh). Pouco despois Ishupitta foi cedida por Muwatallis II ao seu irmán Hattusilis dentro do reino vasalo de Hakpis.