Huesca - Uesca

Huesca - Uesca
Cidade de Huesca
Situación xeográfica
Estado:	España
Comunidade Autónoma:	Aragón
Provincia:	Huesca
Comarca:	Hoya de Huesca
Xeografía
Altitude:	488 msnm
Superficie:	14,9 km²
Poboación
Poboación total:	51.117 hab. (INE 2008)
Densidade de poboación:	317,5 hab./km²
Xentilicio:	Oscense
Información
Código postal:	22002
Alcalde:	Fernando Elboj Broto (PSOE)
Sitio na web:	www.ayuntamientohuesca.es

Huesca ou Uesca (en castelán antigo e catalán: Osca) é unha cidade española, capital da provincia de Huesca e da comarca Hoya de Huesca, situada ao norte da comunidade autónoma de Aragón. O xentilicio correspondente a esta cidade é o de oscense.

Xeografía

Huesca está situada a sudoeste da súa provincia, en territorio do Somontano pirenaico, caracterizado por pequenas elevacións, aínda que ás veces abruptas (os mallos), que alternan con chairas e depresións. Nunha destas, chá e feraz,regada polo río Isuela, érguese a cidade ("Hoya de Huesca").

O clima é mediterráneo continentalizado.

Historia

En época prerromana, os ilergetes ocupaban a rexión oscense. A cidade denominábase Bolskan, e cuñaba moeda no século II a.C.

Durante o século I a.C., con o nome de Osca, era xa unha cidade plenamente romanizada. Foi capital da Hispania de Sertorio, revirada contra a República Romana. Suponse que Sertorio morreu nesta cidade.

Foi elevada á categoría de municipio por Augusto no ano 30 a.C., máis dependente con todo de Cesaragusta. Plinio o Vello sitúa Osca na rexión que chama Vescitania. Probabelmente é a mesma cidade que Estrabón cita como Ileoscan. Creuse que tiña minas de prata, cousa que o Pde. Flórez puña en dúbida.

Vista de Huesca desde a catedral

Logo da etapa visigoda e da invasión árabe, Osca pasou a ser controlada polos musulmáns, que a chamaron Wasqa. Fronteira enfronte dos reinos cristiáns do norte, foron insistentes os intentos de asedio que sufriu, o que tornou a cidade nunha base militar de primeiro rango.

No ano 1094 o rei cristián, Sancho III de Aragón, tentou, unha vez máis, tomar Huesca, construíndo preto o castelo de Montearagón, pero morreu dunha setada, cando realizaba un recoñecemento da muralla. Dous anos logo, na primavera de 1096, un exército cristián, liderado polo rei Pedro I, asediou a cidade durante seis meses. Huesca foi entregada ao rei Pedro, o 26 de novembro de 1096, que trasladou a capital do reino de Aragón para a cidade. Porén, cando en 1118, o rei Afonso o Batallador, tomou Zaragoza, Huesca deixou de ser a capital, pois a cidade recentemente tomada seríao desde entón.

En 1837, o pretendente carlista, Carlos María Isidro, tomou a cidade.

Durante a Guerra Civil, Huesca caíu en mans dos militares sublevados. Os intentos das tropas republicanas por retomala varias veces, foron inútiles, a pesar de dominar a próxima Montearagón.

Patrimonio artístico

Portada da Sé de Huesca

• Catedral, gótica, edificada entre 1275 e 1515, sobre construcións anteriores. Altar-mor obra de Damián Forment. Posúe fermosas capelas e notábel cripta. Vitrais de Francisco de Valdivieso. O claustro, porén, é románico.
  • Museo diocesano.
  • Pazo episcopal.
• Igrexa de San Pedro o Vello, igrexa románica con interesante claustro do mesmo estilo. Sepulcros de reis aragoneses. Altares do XVI e XVII.
• Igrexa de San Miguel, obra de transición románico-gótica.
• Igrexa de San Lourenzo, edificación complexa, con obra gótica, e fachada barroca. Pinturas de Jusepe Martínez.
• Igrexa dos santos Domingos e Martiño, gótica en orixe, con reformas barrocas.
• Igrexa de San Vicente, barroca, en ladrillo.
• Seminario da Santa Cruz, con igrexa de 1571, que conserva a ábsida, anterior, gótica.
• Casa do Concello, obra tardo-renacentista de Miguel de Allué, sita na mesma praza da catedral.
• Colexio Imperial, datado en 1534, na mesma praza que o edificio devandito.
• Conxunto da Universidade Sertoriana, contén entre outros:
  • Pazo dos Reis de Aragón,
  • Zuda árabe,
  • Museo Provincial, exhibe desde frescos románicos a coleccións pictóricas de mestres renacentistas, barrocos e outros.

Festas

• San Vicente, festas menores (22 de xaneiro).
• San Xurxo (23 de abril).
• San Lourenzo, festas maiores da cidade (9 a 15 de agosto).

Oscenses ilustres

• Pedro Alfonso (1062 - 1140), escritor, teólogo e astrónomo.
• Petronila Ramírez (1136 - 1173), raíña de Aragón.
• Alfonso II el Casto o el Trovador (1157 - 1196), rei de Aragón.
• Pedro II el Católico (1178 - 1213), rei de Aragón.
• Vincencio Juan de Lastanosa (1607 - 1681), mecenas do barroco e editor de Baltasar Gracián.
• Lucas Mallada (1841 - 1921), escritor do Rexeneracionismo, xeógrafo e paleontólogo.
• Fidel Pagés (1886 - 1923), médico ciruxano, descubridor da anestesia epidural.
• Ramón Acín Aquilué (1888 - 1936), artista e militante anarcosindicalista.
• Pepín Bello (1904 - 2008), membro da Xeración do 27.
• Julio Alejandro (1906 - 1995), escritor guionista de películas de Luis Buñuel.
• Jaime Gaspar y Auría (1920 - 1993), político e profesor.
• Antonio Saura (1930 - 1998), pintor.
• Carlos Saura (n. 1932), director de cine.

Cidades irmandadas

• Tarbes, Francia.

Véxase tamén

• Concello de Huesca
• El Altoaragón y Huesca Portal Web
• Unha visión diferente de Huesca
• Rueiro fotográfico da cidade