Hesíodo

Hesíodo
Nome orixinal	(grc) Ἡσίοδος
Biografía
Nacemento	c. 776 a. C. (2798/2799 anos); Cime (pt)
Morte	Ascra, Grecia (pt)
Datos persoais
País de nacionalidade	Cime (pt)
Actividade
Ocupación	poeta , rapsodo (pt) , escritor , mitógrafo
Xénero artístico	Poesía
Lingua	Grego antigo
Obra
	Obras destacables Catálogo de Mulheres (pt) ; (século VII a. C.) Teogonía; (século VIII a. C.) Traballos e días ;
Familia
Irmáns	Perses (en)

Hesíodo (en grego antigo Ἡσίοδος Hêsíodos, en latín Hesiodus) foi un poeta da Antiga Grecia. A súa datación en torno ao ano 700 a. C. é discutida. Adoita considerarse o máis antigo dos poetas helenos despois de Homero e, durante boa parte do século XIX, a crítica chegou a dubidar da súa auténtica existencia, aínda que esta parece fóra de toda dúbida na actualidade.

Biografía[editar | editar a fonte]

Naceu en Ascra, preto de Tebas, sobre a segunda metade do século -VIII ou a primeira do século -VII Foi labrego e fillo dun comerciante. A tradición sitúao como contemporáneo de Homero e mesmo rival seu en certames poéticos.

A familia de Hesíodo estableceu a súa residencia en Beocia, procedente de Cime de Eolia, lugar de orixe do seu pai. Pouco se sabe da súa vida; parece que foi fundamental nela a inimizade co seu irmán Perses por mor da herdanza paterna, e abordou este tema na súa obra Traballos e días. Morto o seu pai, Hesíodo estableceuse en Naupacto, onde pasou a súa mocidade ao coidado dun rabaño de ovellas e levando a vida plácida e sinxela dos campesiños gregos.

Os actuais especialistas sitúano como contemporáneo de Homero, mais a súa poesía, moi afastada do estilo épico e grandioso da daquel, está destinada a instruír máis que a exaltar. Sábese tamén que en Calcis (Eubea) participou nun concurso de aedos e obtivo a vitoria. Parece que morreu en Ascra e as súas cinzas conserváronse en Orcómeno, onde lle renderon honores como a un fundador da cidade.

Moitas das obras que durante a Antigüidade se lle atribuían, como os poemas sobre arte adiviñatoria A ornitomancia, Os versos mánticos e As explicacións dos prodixios, non son realmente súas. O que parece probado con certeza é que foi o autor dos Traballos e días, da Teogonía, que explica a orixe do universo e a xenealoxía dos deuses, e dos cincuenta e catro primeiros versos do O escudo de Heracles. Xunto coas de Homero, as obras de Hesíodo converteríanse en parte do corpus fundacional da cultura grega, grazas ao seu labor de sistematización do conxunto de mitos herdados e ao inicio da súa interpretación nun sentido moral e práctico. A cultura grega caracterizaríase en todo momento pola complexa relación que mantería co conxunto de concepcións mitolóxicas e relixiosas das súas propias tradicións, tanto para rexeitalas como para reverencialas, aínda que sempre extraería de alí súas máis fecundas intuicións.

Obra[editar | editar a fonte]

As súas obras, como as de Homero, foron obxecto xa desde o século VI a. C. de estudo e veneración.

É o grande e primeiro compilador da relixión antiga grega. Puxo por escrito e ordenou todo o corpo mitolóxico transmitido ata entón de forma oral. Na súa obra baseáronse os mitógrafos posteriores clásicos, grazas ao cal chegou en gran parte ata os nosos días. A súa obra principal é a Teogonía, na que relata a xenealoxía dos deuses da mitoloxía grega. Exerceu grande influencia na cultura europea, á que transmitiu elementos como o do mito das idades, entre outros.

Transmitíronse de forma completa:

Teogonía
O escudo de Heracles (ou, simplemente, Escudo)
Traballos e días

Consérvanse de forma fragmentaria ou hai referencias de:

Catálogo de mulleres (ou Eeas, en teoría continuación da Teogonía)
Consellos de Quirón ou Grandes Eeas
Casamento de Ceix
Melampodia
Descenso de Pirítoo
Dáctilos ideos
Grandes Traballos
Eximio
Os Oleiros
Ornitomancia
Astronomía

Véxase tamén[editar | editar a fonte]

Bibliografía[editar | editar a fonte]

Hesíodo: Teogonía. Trabajos y días. Escudo. Certamen. Editorial Losada. Buenos Aires. 2007. ISBN 978-950-03-9420-8 (en español).
Hesíodo: Obras y fragmentos: Teogonía. Trabajos y días. Escudo. Fragmentos. Certamen. Editorial Gredos. Madrid. 1997. ISBN 978-84-249-3517-7 (en español).

Outros artigos[editar | editar a fonte]

Teogonía.
Traballos e días.