Hesíone

Na Galipedia, a Wikipedia en galego.

Hesíone foi o nome de varios personaxes distintos da mitoloxía grega.

O máis coñecido foi a filla de Laomedonte, rei de Troia. Un oráculo dixera que para liberar a cidade de Troia dun monstro mariño enviado por Poseidón, Hesíone debía ser dada como sacrificio ó monstro. Laomedonte, disposto a seguir as instrucións do oráculo, encadeou á súa filla fronte ó mar, pero nese momento chegaban á cidade os Argonautas. O heroe Heracles quitoulle as cadeas a Hesíone e fixo un pacto con Laomedonte, mediante o que se Heracles conseguía matar ó monstro, recibiría como premio unhas eguas sagradas que tiña o rei de Troia. Heracles conseguiu matar ó monstro, pero Laomedonte non cumpriu a súa parte do trato, co que o heroe regresou anos despois, como represalia, nunha expedición de conquista e saqueo.

Tras esta expedición, Hesíone foi tomada como esposa por Telamón, que tamén participara na expedición de castigo. Xa que lle permitiron levar consigo a quen quixese, elixiu ó seu irmán Podarces, que a partir de entón foi chamado Príamo.

Príamo, por ser o único descendente home de Laomedonte que quedaba vivo, pasou a ser rei de Troia e decidiu tratar de conseguir o regreso da súa irmá. Para logralo enviou ó seu conselleiro Anténor nunha viaxe diplomática a Grecia, pero os gregos se negaron á devolución.

Segundo algunhas versións, o motivo da viaxe de Paris, fillo de Príamo, a Esparta, foi precisamente volver a reclamar o regreso de Hesíone ou castigar ós gregos por negarse á devolución.

Hesíone e Telamón foron pais de Teucro, que posteriormente participaría na guerra de Troia, no bando dos aqueos.

Outros personaxes do mesmo nome[editar | editar a fonte]

Hesíone foi tamén o nome dunha ninfa filla de Iápeto e Clímene, ou unha oceánide, filla por tanto de Océano e Tetis, seguindo outras versións.

Segundo Esquilo e Acusilao de Argos, Hesíone foi a esposa de Prometeo, o titán benfeitor dos humanos, co que tivo a Deucalión.

Era o nome tamén da segunda esposa de Nauplio, nai de Palamedes, Éax e Nausimedonte.