Gino Bartali

Na Galipedia, a Wikipedia en galego.
Gino Bartali (1938)

Gino Bartali, nado en Ponte de Ema (Florencia) o 14 de xullo de 1914 e finado en Florencia o 5 de maio do 2000, foi un ciclista italiano. Gañou dous Tour de Francia, e é o ciclista que o fixo dun xeito máis distante no tempo (10 anos entre un e outro).

Traxectoria[editar | editar a fonte]

Iniciouse como profesional en 1935, ano no que gañou unha Volta ao País Vasco e a clasificación na montaña no Giro de Italia. Gañaría tres Giros de Italia en 1936, 1937 e 1946 e 12 vitorias parciais. Foi catro anos segundo. Gañou sete veces o Gran Premio da Montaña nesa volta por tiradas.

Gañou o Tour de Francia en 1938 e 1948 e 12 tiradas nesa carreira. En 1949 foi segundo. Venceu catro veces na Milán-San Remo e dúas no Giro de Lombardía e adxudicouse en dúas ocasións a Volta a Suíza.

Rivalizou con Fausto Coppi. Relegouno á segunda posición no Giro en 1946. Coppi desprazaríao a esa praza en 1947 e 1949. Ese ano foi a apoteose italiana no Tour onde os dous campións dominaron a carreira sendo Coppi primeiro e Bartali segundo.

Tivo que afrontar a interrupción da Segunda Guerra Mundial. A súa fe católica explica algúns do seus alcumes como Gino o pío. Un accidente obrigouno a retirarse en 1954.

A República Italiana ten recoñecido o valor del e a súa dona por ter salvado a moitos xudeus na época do fascismo. A súa dona Adriana recibiu a medalla de ouro ao valor civil no 2006.