Fokker 100

Na Galipedia, a Wikipedia en galego.
Fokker 100
Fokker 100 Portugalia CS-TPB.jpg
Fokker 100 de Portugalia
Tipo pasaxeiros
Fabricante Fokker
Primeiro voo 30 de novembro de 1986
Introducido febreiro de 1988
Produción 1986 - 1997
Construídos 283
Variantes Fokker 70

O Fokker 100 é un avión de pasaxeiros de tamaño medio fabricado por Fokker. Os seus baixos custes operacionais e a escasa competencia no rango dos 100 asentos e curto alcance levaron a unhas fortes vendas do modelo cando foi introducido a finais dos 80, pero estas disminuíron a medida que a competencia aumentou. A fabricación rematou en 1997 con 283 unidades entregadas. En xullo do 2012 aínda quedaban 156 Fokker 100 en servizo con 30 aeroliñas de todo o mundo.

Deseño e desenvolvemento[editar | editar a fonte]

O programa Fokker F28 Mk 0100 anunciouse en 1983 como un substituto mellorado para o popular Fokker F28. Comercializado como Fokker 100, o deseño estaba baseado no F28 orixinal pero con aviónica moderna, motores turbofán Rolls-Royce Tay de nova xeración e unha á redeseñada. Porén a diferenza máis destacable foi a fuselaxe máis longa, incrementando o número de pasaxeiros dos 65 do F28 a 107 nunha configuración de clase única. Fokker afirmaba que a nova á era un 30% máis eficiente en cruceiro, mentres que aínda conservaba a simplicidade do bordo de ataque fixo. A cabina foi mellorada cun sistema electrónico de instrumentos de voo Rockwell Collins DU-1000. Ao igual que o F28, o Fokker 100 conta cos motores na parte traseira da fuselaxe e unha cola en T, semellante aos avións da familia Douglas DC-9.

Fabricáronse dous prototipos. O primeiro, PH-MKH, voou por vez primeira o 30 de novrmbro de 1986, e o segundo, PH-MKC, o 27 de febreiro de 1987. O modelo foi certificado en novembro de 1987. As primeiras entregas das versións impulsadas polo TAY620-15 comezaron para Swissair en febreiro de 1988. American Airlines (con 75 avións pedidos), TAM Transportes Aéreos Regionais (na actulidade TAM Airlines) (con 50 unidades) e USAir (con 40) foron os maiores clientes do Fokker 100 e os seus exemplares foron equeipados co máis potente motor TAY 650-15.