Figueirido, Vilaboa

Para outras páxinas con títulos homónimos véxase: Figueirido.

Santo André de Figueirido
igrexa parroquial
Concello	Vilaboa
Área	3,74 km²
Poboación	781 hab. (2011)
Densidade	208,82 hab./km²
Entidades de poboación	9

Santo André de Figueirido é unha parroquia que se localiza no concello pontevedrés de Vilaboa. Segundo o INE no 2011 tiña 781 habitantes (402 mulleres e 379 homes), distribuídos en 9 entidades de poboación, 58 menos ca en 1999. É a parroquia menos poboada do concello, por tras de Santa Comba de Bértola.

Xeografía

Limita ao norte con Santa Comba de Bértola, ao suroeste con Vilaboa, ao leste coa Canicouva (Pontevedra), e ao noroeste con Salcedo (Pontevedra).

Na parroquia nace o río dos Gafos, que discorre cara ao norte. O curso forma un val polo que pasa a vía portuguesa do Camiño de Santiago, percorrendo un tramo da antiga vía XIX do itinerario de Antonino.

Comunícase a través da estrada N-550, e pola autoestrada AP-9 (cunha estación de peaxe). Tamén pasa pola parroquia a vía de ferrocarril entre Pontevedra e Redondela. Antigamente existía o apeadoiro de Figueirido, pero o desvío do corredor atlántico para a liña do Eixe atlántico de alta velocidade provocou a construción dun túnel na zona.

Patrimonio

A igrexa parroquial é barroca, do século XVII, se ben conserva parte da ábsida rectangular de estilo románico. Sobre o testeiro ten un agnus dei, e nun dos laterais ten unha saeteira románica. Ten planta rectangular, co presbiterio cuberto con bóveda de canón. Unha das pedras do muro sur ten gravado un dameiro.

Na parroquia está a base militar da BRILAT.

Deportes

Na parroquia está o Figueirido C.F. que milita na 2ª División Rexional.

Véxase tamén

Outros artigos

• Lugares de Vilaboa