Felipe Fernández-Armesto

Na Galipedia, a Wikipedia en galego.

Felipe Fernández-Armesto, nado en Londres en 1950, é un historiador británico de orixe galega, fillo do periodista Felipe Fernández Armesto (coñecido como Augusto Assía). A súa nai foi a periodista inglesa Betty Millian de Fernández-Armesto, cofundadora e editora de The Diplomatist, diario interno do corpo diplomático acreditado en Londres. É o pai do actor Sebastian Armesto, xunto coa súa esposa, Lesley Patricia Hook.

Traxectoria[editar | editar a fonte]

Doutor en Historia pola Universidade de Oxford, onde desenvolveu gran parte da súa carreira profesional, foi profesor en varias universidades e institutos de investigación en Europa e América, impartindo clases na Universidade de Londres (Queen Mary College), na Tufts University de Massachusetts, Yale, Columbia e Cambridge.

En 1982 publicou The Canary Islands after the Conquest: The Making of a Colonial Society in the Early Sixteenth Century ("Canarias despois da conquista: a construción dunha sociedade colonial a comezos do século XVI"), estudo do primeiro asentamento europeo nas illas. En 1987 publicou Before Columbus: Exploration and Colonization from the Mediterranean to the Atlantic 1229-1492 ("Antes de Colón: exploración y colonización do Mediterráneo até o Atlántico 1229-1492"), un estudo da primeira fase do imperialismo europeo cando os europeos deixaron o Mediterráneo e colonizaron as illas ao longo da costa noroeste de África, cos que comezou unha vasta serie de libros e artigos, algúns traducidos a vinte e tres idiomas, entre os que destacan os títulos Columbus (1992), Millennium (1995), Civilizations (2002), Barcelona: mil anos de historia (2006) e Pathfinders: a Global History of Exploration (2006).

Desde setembro de 2005 até 2009 exerceu a cátedra Príncipe de Asturias da Tufts University, en Boston (Massachusetts, Estados Unidos de América). En 2009 incorporouse ao departamento de historia da Universidade de Notre Dame (Indiana, Estados Unidos de América).

Fernández-Armesto gañou a atención dos medios en 2007 pola súa denuncia contra cinco policías en Atlanta, Georgia, de presunto embrutecemento pola súa detención por facer jaywalking (cruzamento peonil ilegal ou imprudente dunha estrada).[1] [2]

Pricipais obras[editar | editar a fonte]

  • The Spanish Armada (1990) (A Armada invencíbel).
  • Columbus (1991) (Colón).
  • Millennium: A History of Our Last Thousand Years (1995) (Milenio: os nosos últimos mil anos de historia).
  • Reformation: Christianity & the World 1500 - 2000 (1996) (con Derek Wilson) (A Reforma: cristiandade e mundo 1500-200).
  • Truth: A History and a Guide for the Perplexed (1997) (A Verdade: historia guía para perplexoe).
  • Civilizations (2000).
  • Food: A History (2001).
  • The Americas: A Hemispheric History (2003) ISBN 0375504761
  • Ideas That Changed the World (2003) (Ideas que cambiaron o mundo)
  • Historia de la Comida. Alimentos, cocina y civilización (2004) Barcelona: Tusquets Editores. ISBN 978-84-8310-938-0
  • Humankind: A brief History (2004).
  • Pathfinders: a Global History of Exploration (2006) (Os conquistadores do horizonte: unha historia mundial da exploraxión)
  • The World: A Global History (2007) (O mundo: Historia)
  • Américo: El hombre que dio su nombre a un continente (2008). Barcelona: Tusquets Editores. ISBN 978-84-8383-050-5
  • 1492. The Year the World Began (2009) (1492: O nacemento da modernidade)

Premios e honras[editar | editar a fonte]

Entre outras distincións, Fernández-Armesto foi galardoado coa medalla John Carter Brown, a medalla Caird do Museo Marítimo Nacional do Reino Unido, e a medalla do tricentenario da Sociedade de Anticuarios de Londres.

Amais, recibiu o Premio Nacional de Investigación da Sociedade Xeográfica Española, o Premio Nacional de Gastronomía da Real Academia de Gastronomía de España polo libro Historia de la comida, e o premio da World History Association Book Prize polo libro Pathfinders: a Global History of Exploration (2007).

No ano 2008 foi nomeado doutor honoris causa pola Universidade dos Andes (Bogotá, Colombia).

Notas[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]