Fanzine

Na Galipedia, a Wikipedia en galego.

Un fanzine é unha publicación amateur realizada por fans con temáticas moi variadas que poden abranguer varios campos ou centrarse nun só aspecto (música, banda deseñada, etc.) e que teñen por albo compartir con outras persoas eses intereses. O termo foi acuñado no ámbito anglófono durante a primeira metade do século XX e ten a súa orixe na aglutinación das palabras fanatic (fanático) e magazine (revista).

Características[editar | editar a fonte]

Estas publicacións adoitan ser gratuítas, renunciando todas as persoas involucradas na súa creación a percibiren algunha retribución económica. Adoitan ser distribuídas sen coste algún ou ben cargando os custos de envío ou unha cantidade nominal para cubrir custos. Tamén é habitual o intercambio deste tipo de material entre as comunidades de fans. Porén, algúns fanzines chegaron a profesionalizarse ata certo punto, sendo difícil saber se continúan a encaixar dentro da definición deste termo.

Polos seus contidos máis habituais e relacionados con este medio (entre estes poderiamos citar unha longa lista que incluiría: banda deseñada, ficción científica, política, poesía, collage, arte, música, feminismo, vexetarianismo, veganismo, cinema, xogos de computador,...), así como pola súa linguaxe propia rompedora e experimental, os fanzines asócianse normalmente á "cultura xuvenil", se ben a amplitude conceptual destes fan que tamén haxa espazo neles para estudos máis "serios", ou mesmo de carácter erudito, das máis variadas temáticas.

Os fanzines tamén se soen relacionar polo seu carácter marcadamente underground cos movementos contraculturais dos anos 60 e 70 do século XX en diante (especialmente na Francia de 1968).

Nos últimos anos, co desenvolvemento de novas tecnoloxías da comunicación apareceu unha variante do fanzine: o webzine (ou e-zine). Trátase dun fanzine non editado en papel, senón distribuído a través da internet.

Véxase tamén[editar | editar a fonte]

Outros artigos[editar | editar a fonte]