Ernesto Guerra da Cal

Na Galipedia, a Wikipedia en galego.
Ernesto Guerra da Cal
Ernesto Guerra da Cal
Nacemento: 19 de decembro de 1911
Ferrol, Galicia Galiza
Falecemento: 28 de xullo de 1994
Lisboa, Portugal Portugal
Nacionalidade: Galicia Galego
Flag of the United States.svg Estadounidense
Ocupación: Filólogo e escritor

Ernesto Román Laureano Pérez Guerra, máis coñecido como Ernesto Guerra da Cal, nado en Ferrol o 19 de decembro de 1911 e finado en Lisboa o 28 de xullo de 1994, foi un filólogo e escritor galego.

Traxectoria[editar | editar a fonte]

Placa rúa Ernesto Guerra da Cal en Ferrol.

Nacido en Ferrol, tras a temperá morte do seu pai, a súa nai trasládase a Madrid para retomar os seus estudos na Escola Superior Normal, deixándoo a el e o seu irmán ao cargo da familia de Quiroga, Lugo, vila onde pasa a súa infancia e coa que conservará sempre unha fonda ligazón sentimental.

Cando conta con apenas 11 anos a súa nai obtén praza de mestra en Madrid, e leva a ambos os fillos con ela. Ernesto vivirá na capital entre os once e os vinte e cinco anos. Nela cursa o bacharelato e a carreira de Filosofía e Letras, ao tempo que comeza a desenvolver unha certa conciencia política que o leva a participar das protestas estudantís contra a ditadura de Miguel Primo de Rivera, sendo detido varias veces. Tamén entra en contacto coa vida intelectual da capital, asistindo ás sesións do Ateneo e entrando en contacto con algunhas figuras destacadas. No ano 1931 coñece a Federico García Lorca, persoa coa que vai ter unha grande amizade e coa que compartirá a ideoloxía republicana. Nos primeiros anos da Segunda República Española, ambos acudirán xuntos a diversas tertulias da capital, tanto as da Casa de las Flores, organizadas por Pablo Neruda, como as do Café Regina, de carácter galeguista. Guerra da Cal asistirá tamén á fundación de La barraca, o grupo teatral de Lorca, e porá a este en relación con algúns intelectuais galegos, destacadamente con Eduardo Blanco Amor. A relación entre ambos está tamén no transfondo da composición do seu libro Seis poemas galegos, do que Guerra da Cal actuaría como un dos incitadores e como puntual auxilio lingüístico.

Cando comeza a Guerra Civil española, Ernesto vai combater do lado republicano formando parte das Milicias Gallegas. No 1937 aparece na revista Nova Galiza, o seu poema Mariñeiro fusilado, a súa primeira publicación literaria. En 1939, a derrota republicana sorpréndeo en Nova York, cumprindo unha misión para o goberno da República. Ficará exiliado na cidade norteamericana, onde nos primeiros anos entra en contacto novamente con Castelao e outros exiliados.

Nos Estados Unidos vai desenvolver unha frutífera carreira académica. Primeiro ocupará a cátedra de Linguas e Literaturas Románicas, e despois será director do Departamento de Español e Portugués do Washington Square College. Neses anos publica Língua e estilo de Eça de Queirós (1954), un dos estudos máis importantes sobre o autor portugués. En 1956 colabora tamén no Dicionário de Literatura Portuguesa, Brasileira e Galega de Jacinto do Prado Coelho, encargándose das entradas referidas á literatura galega. Tamén neses anos desenvolve a creación literaria, dando ao prelo libros de poemas como Lúa de além-mar (1959), Poemas (1961), Rio de sonho e tempo (1962) ou Motivos de eu (1966).

Ao adoptar a nacionalidade estadounidense, no ano 1954 adopta tamén legalmente o nome de Ernesto Guerra da Cal, aplicando as regras anglosaxoas de formación de nomes, nas que o apelido da nai vai en primeiro lugar.

No ano 1977, xa xubilado, pasará a vivir en Estoril, Portugal. Neses anos publica, entre outros libros, os poemarios Futuro inmemorial (1985), Deus, tempo, morte, amor e outras bagatelas (1987), Espelho cego (1990) e Caracol ao Pôr-do-Sol.

É de destacar, tanto na súa traxectoria académica como literaria, o firme compromiso, político e ortográfico, coa unidade da lingua galego-portuguesa e co espazo da lusofonía.

Morre en xullo do ano 1994, en Lisboa, cidade na que está enterrado.

Véxase tamén[editar | editar a fonte]

Ligazóns externas[editar | editar a fonte]