Enrique Valero Gutiérrez del Olmo

Enrique Valero Gutiérrez del Olmo

Biografía
Nacemento	1958 (65/66 anos) Madrid, España
Datos persoais
País de nacionalidade	España
Educación	Universidade Politécnica de Madrid
Actividade
Ocupación	enxeñeiro forestal
Lingua	Lingua castelá

Enrique Valero Gutiérrez del Olmo, naceu en 1958 en Madrid, onde estudou Enxeñería Superior de Montes (1975) na Universidade Politécnica de Madrid. Completou a súa formación académica en Valencia realizando o mestrado en Ordenación do Territorio por FUNDICOT (Universidade Politécnica de Valencia) en 1994. Acadou o título de doutor pola Universidade Politécnica de Madrid en 1992.

Traxectoria

En 1986 obtén a praza de funcionario do corpo especial de enxeñeiros de montes do Estado, logo transferido á Xunta de Galicia. Nese mesmo ano trasládase a Galicia, para vivir na cidade de Ourense ata 1987, onde comeza a súa traxectoria profesional na Administración galega.

En 1989 trasládase a Santiago de Compostela, para desempeñar varios cargos no eido do medio ambiente na Xunta de Galicia, compatibilizando a súa actividade na Administración galega coa actividade académica no Campus Universitario de Pontevedra, como profesor asociado da Escola de Enxeñaría Forestal de Pontevedra, impartindo disciplinas como Proxectos, Planificación física, Caza e pesca fluvial, e Hidroloxía forestal, entre outras.

En 1998 obtén a praza de profesor titular de universidade na área de coñecemento de Enxeñería agroforestal, do departamento de Enxeñería dos Recursos Naturais e Medio Ambiente da Universidade de Vigo.

Investigación

É director do grupo de investigación AF-4 da Universidade de Vigo, especializado en planificación e xestión de recursos naturais renovables, dende 1999. A súa actividade investigadora está estruturada ó redor de cinco liñas ou disciplinas, cada unha con varios proxectos en desenvolvemento ou consolidados: recursos faunísticos, cinexéticos e piscícolas; planificación, xestión, fragmentación e conectividade entre espazos naturais; monitoraxe e seguimento ambiental de hábitats e ecosistemas naturais, en especial dos acuáticos; e enerxías renovables e planificación dos recursos e aproveitamentos forestais.

Dirixiu entre 2002 e 2007 o Observatorio Ambiental para as PEME do Sur de Galicia (OBSAM-SURGAL), financiado pola Fundación Biodiversidad e a Universidade de Vigo, no que desenvolve diversas actividades de transferencia e formación ambiental, nunha iniciativa por consolidar a integración do medio ambiente no tecido empresarial galego.

Participou ademais na elaboración de documentos de xestión como o Plan Director da Rede Natura 2000 de Galicia e no Libro Blanco de la Agricultura y Desarrollo Rural, e é autor do libro Los parques naturales en España: Conservación y disfrute (Mundi-Prensa, 2002), xunto con José Antonio Corraliza e Justo García Navarro, polo que foron galardoados co Premio Alfonso Martín Escudero en 2001.

---

Cargos desempeñados

• Director da Escola de Enxeñaría Forestal de Pontevedra, 1999-2004; 2012-).
• Xefe do Servizo de Produción e Industrias Forestais (Xunta de Galicia, 1994).
• Xefe da Sección de Fomento Forestal (Xunta de Galicia, 1993).
• Subdirector Xeral de Medio Ambiente Natural, Caza e Pesca Fluvial (Xunta de Galicia, 1991).
• Xefe do Servizo de Caza, Pesca Fluvial e Medio Ambiente Natural (Xunta de Galicia, 1990).
• Xefe da Sección de Ordenación de Recursos Cinexéticos (Xunta de Galicia, 1989).

Cargos de representación

• Membro do Comité Consultivo de Medio Ambiente da Comisión Europea.
• Membro do Comité Consultivo de Bosques e Cortiza da Comisión Europea.
• Membro do Consello de Goberno e da Comisión de Planificación (Universidade de Vigo, 2015).
• Membro do Consello Asesor do Centro de Investigación e Servizos da Madeira (CIS-Madeira, 1999).
• Membro da Asociación Galega para a Certificación Forestal (2003).
• Membro do Consello Forestal de Galicia (2005).
• Membro do Consello Galego de Medio Ambiente (2010).
• Membro do Comité Galego de Caza (2011).