Encefalopatía esponxiforme bovina
Na Galipedia, a wikipedia en galego.
A encefalopatía esponxiforme bovina ou enfermidade das vacas tolas (tamén coñecida polas súas siglas EEB ou BSE, segundo a denominación inglesa Bovine Spongiform Encephalopathy) é unha enfermidade causada por un prión, propia do gando vacún e transmible ós seres humanos a través do consumo de partes de animais infectados, sobre todo tecidos nerviosos.
A encefalopatía esponxiforme bovina é unha enfermidade de recente aparición, pertencente a unha familia de enfermidades emparentadas, moi raras na súa maioría. Os primeiros casos de animais enfermos declaráronse no Reino Unido en 1986. En 1996 detectouse no home unha nova enfermidade, unha variante da Enfermidade de Creutzfeldt-Jakob, que se relacionou coa epidemia de EEB no gando vacún.
Índice |
[editar] Epidemioloxía
É unha enfermidade dexenerativa do sistema nervioso central dos bovinos, que se caracteriza pola aparición de síntomas nerviosos nos animais adultos e que, progresivamente, finaliza coa morte ou sacrificio do animal.
A enfermidade está causada por un axente contaxioso non convencional, unha proteína infecciosa denominada "prión". O periodo de incubación da enfermidade é de 4 ou 5 anos.
Os síntomas observados están motivados pola acumulación do prión nas células neuronais, orixinando a morte celular. Unha análise microscópica revela lesións como vacuolas que dan ó tecido nervioso un aspecto de esponxa.
A vía de transmisión desta enfermidade coñecida ata o de agora é a inxestión polos animais de alimentos contaminados co prión e posiblemente de nai a cría. O único método dispoñible para detectar a infección en fase terminal é a inoculación parenteral de tecido encefálico en ratos, pero esta técnica non é utilizable na práctica, xa que os períodos de incubación son duns 300 días.
O prión causante da enfermidade acumúlase sobre todo no cranio (incluídos encéfalo e ollos), as amígdalas, a medula espiñal, o espiñazo, o intestino (do duodeno ó recto) e o bazo.
 |
Atención: este artigo precisa dun traballo de revisión.
|
Unha teoría actual de científicos británicos di que a enfermidade foi creada a través de alimento para gando contaminado con restos humanos. Gran Bretaña importou centos de miles de toneladas de ósos enteiros e pulverizados e de partes de cadáveres desde o sur de Asia nos anos 60 e 70 para facer fertilizantes e fariña de óso. Entre eses ósos poderían haber ósos humanos de cadáveres abandonados nos ríos da India.
A maioría dos científicos pensan que a enfermidade se orixinou nos propios animais e no consumo de restos non humanos.
[editar] Incidencia
Ata o momento declaráronse case 200.000 reses enfermas de EEB en todo o mundo[Cómpre referencia], a maioría no Reino Unido. Por outra parte, observáronse 91 pacentes humanos afectados[Cómpre referencia]. Só na Gran Bretaña foron sacrificadas máis de 2 millóns de reses[Cómpre referencia].
[editar] Véxase tamén
[editar] Ligazóns externas
- Páxina da OMS (en castelán)
- Enfermidade das Vacas Tolas Información do Center for Global Food Issues (en inglés)
