Cuíña, Ortigueira

Para outras páxinas con títulos homónimos véxase: Cuíña.

Cuíña
Igrexa de Santiago de Cuíña
Concello	Ortigueira
Área	5,6 km²
Poboación	(Ano 2009) 321 hab.
Densidade	57,3 hab./km²
Entidades de poboación	40

Santiago de Cuíña é unha parroquia do concello coruñés de Ortigueira, na comarca do Ortegal.

Poboación

Segundo o padrón municipal de 2009 tiña 321 habitantes (166 mulleres e 155 homes) distribuídos en 40 entidades de poboación, o que supón unha diminución en relación ao ano 1999 cando contaba con 365 habitantes.

Xeografía

Localización da parroquia no concello de Ortigueira

Cuíña está situada na beira leste da ría de Ortigueira, na marxe dereita do río Maior, nas abas dos montes Meixón, Burgo e Penaoseira. Os seus límites son: polo norte coa parroquia de Ortigueira e coa ría dende a desembocadura do río Maior até o camiño da Lagarea, polo nordeste coas parroquias de Luía e Barbos, polo leste limita coa parroquia de San Salvador de Couzadoiro, polo sur coa parroquia dos Freires e polo oeste co río Maior que a separa da parroquia de Senra.

Como tantas outras parroquias co paso do tempo a poboación foise asentando nas proximidades da estrada AC-862 que a atravesa polos lugares da Clara e A Lagarea ao pé da ribeira do mar.

Patrimonio

A igrexa parroquial, situada no lugar do Igrexario é unha construción moderna de principios de 1900, de cruz latina. O campanario foi rematado non hai pouco ao tempo que se recubría todo o corpo do templo cun lucido de cemento ocultando unha estrutura de pedra moi fermosa. O cemiterio está algo afastado, o mesmo que a reitoral, aínda que sen saír do mesmo lugar.

Véxase tamén

Outros artigos

• Lugares de Ortigueira