Coruxo (peixe)
O coruxo (Scophthalmus rombus, Linnaeus, 1758) é un peixe plano, esquerdo, da familia dos Scophthalmidae , semellante ó rodaballo pero de menor tamaño.
O nome de coruxo é propio da costa occidental de Galicia, desde Mugardos á Guarda, coas variantes caruxo, curuxo, curuxa e cruxo; pero na costa norte, desde Pontedeume a Ribadeo, recibe os nomes de sollo e, concretamente en Mera (Oleiros), solla [1]. Outros nomes que tamén lle dan son os de brisca, rascapedras, tapa, tapaconas e tapaconos.
Índice |
[editar] Características
Presenta un corpo case circular ou romboidal, alto coma o rodaballo, coa cara pigmentada esquerda. A cor é castaña clara, ás veces verdosa, con manchas escuras irregulares distribuídas por todo o corpo; a estas manchas escuras debe o nome que tamén recibe de rodaballo negro, en Bares. A cara ventral é branca ou de cor crema.
As aletas dorsal e ventral mostran os radios centrais máis longos ca nos extremos, aínda que non chegan a formar ángulo, cousa que si acontece no caso do rodaballo. É característico que os primeiros radios da aleta dorsal estean soltos (sen membrana interradial) e ramificados. Outra diferenza respecto ó rodaballo é a presenza de escamas, das que carece o rodaballo, e a ausencia deses tubérculos óseos típicos deste último [2].
Os ollos son grandes e separados. A boca, grande e oblicua, e a comisura sobrepasa o bordo posterior do ollo.
[editar] Hábitat e distribución
Vive sobre fondos areosos de profundidade media, de 2 a 100 metros. Péscase no Atlántico Norte, no mar Báltico e no Mediterráneo. A época de reprodución é entre abril e agosto, para o que ascenden a augas de 10-20 metros de profundidade, entrando no interior das rías.
Pode medir ata 80 cm de lonxitude e pesar ata 3 kg, aínda que as medidas habituais oscilan entre os 30 e os 50 cm. A talla mínima son 30 cm.
Péscase con artes de trasmallo, palangre e miños.
As capturas en Galicia ascenderon a 30.261 kg en 2010, por riba das cifras de 2009: 26.981 kg [1]
[editar] Galería de imaxes
-
Cara ventral, cega
[editar] Notas
- ↑ Non debe confundirse con outro peixe plano, tamén chamado solla, que en realidade é nome que se aplica a dúas especies: Platichthys flesus e Pleuronectes platessa, moi semellantes entre si; e moito menos co sollo rei, por veces simplemente sollo, que é o esturión (Acipenser sturio) e non se parece en nada a estes peixes planos.
- ↑ O Pai Crespo e Cornide recolleron para este peixe o nome de escamudo, por esta razón, a diferenza de escamado, para o rodaballo.
[editar] Véxase tamén
[editar] Bibliografía
- Dirección Xeral de Formación Pesqueira: Guía do consumidor de peixe fresco. Xunta de Galicia 1999.
- RÍOS PANISSE, M. Carmen: Nomenclatura de la flora y fauna marítimas de Galicia (Invertebrados y peces). Anejo 7 de Verba, 1977.
- RODRÍGUEZ VILLANUEVA, X. L. e VÁZQUEZ, Xavier: Peixes do mar de Galicia. Xerais, Vigo 1995.
