Correpresor

Na Galipedia, a Wikipedia en galego.

En bioloxía molecular, un correpresor é unha substancia que inhibe a expresión de xenes. Nos procariotas, os correpresores son pequenas molécuas, mentres que nos eucariotas son proteínas. Un correpresor non se une directamente ao ADN, senón que o regula indirectamente ao unirse a un represor.

Un correpresor regula á baixa (ou reprime) a expresión de xenes ao unirse e activar unha molécula represora. O represor á súa vez únese ao promotor dun xene (unha secuencia de ADN adxacente ao xene regulado), bloqueando deste modo a transcrición de dito xene.

Función[editar | editar a fonte]

Procariotas[editar | editar a fonte]

Nos procariotas o termo correpresor utilízase co significado de ligando activador dunha proteína represora. Por exemplo, o represor do triptófano (TrpR) de Escherichia coli só pode unirse ao ADN e reprimir a transcrición do operón trp se o seu correpresor o triptófano se une a el. O TrpR en ausencia de triptófano denomínase aporrepresor e é inactivo e non pode reprimir a transcrición.[1] O operón trp codifica encimas responsables da síntese do triptófano. Iso quere dicir que o triptófano é o produto final da expresión dos xenes dese operón, pero tamén funciona como correpresor, regulando a súa propia síntese. Por tanto, neste operón funciona un mecanismo de retroalimentación negativa que regula a biosíntese do triptófano. Cando hai moito triptófano na célula o resultado é que se deixa de producir máis triptófano.[2]

Eucariotas[editar | editar a fonte]

Nos eucariotas, un correpresor é unha proteína que se une a factores de transcrición.[3] En ausencia de correpresores e en presenza de coactivadores, os factores de transcrición regulan á alza a expresión xénica. Os coactivadores e correpresores compiten polos mesmos sitios de unión situados nos factores de transcrición. Un segundo mecanismo polo cal os correpresores poden reprimir a iniciación da transcrición cando se unen a complexos factor de transcrición/ADN realízase recrutando histona desacetilases, que catalizan a eliminación de grupos acetilo de residuos de lisina da proteína. Isto incrementa a carga positiva nas histonas, o cal fortalece a atracción electrostática entre as cargas positivas das histonas e as negativas do ADN, facendo que o ADN sexa menos accesible á transcrición.[4][5]

Nos humanos coñécense ducias ou centos de correpresores, dependendo do nivel de confianza co cal se faga a caracterización da proteína como correpresor.[6]

Notas[editar | editar a fonte]

  1. Evans PD, Jaseja M, Jeeves M, Hyde EI (December 1996). "NMR studies of the Escherichia coli Trp repressor.trpRs operator complex". Eur. J. Biochem. 242 (3): 567–75. DOI:10.1111/j.1432-1033.1996.0567r.x. PMID 9022683. 
  2. Foster JB, Slonczewski J (2010). Microbiology: An Evolving Science (Second ed.). New York. ISBN 0-393-93447-0. 
  3. Jenster G (August 1998). "Coactivators and corepressors as mediators of nuclear receptor function: an update". Mol. Cell. Endocrinol. 143 (1-2): 1–7. DOI:10.1016/S0303-7207(98)00145-2. PMID 9806345. 
  4. Lazar MA (2003). "Nuclear receptor corepressors". Nucl Recept Signal 1: e001. DOI:10.1621/nrs.01001. PMC 1402229. PMID 16604174. //www.pubmedcentral.nih.gov/articlerender.fcgi?tool=pmcentrez&artid=1402229. 
  5. Goodson M, Jonas BA, Privalsky MA (2005). "Corepressors: custom tailoring and alterations while you wait". Nucl Recept Signal 3 (Oct 21): e003. DOI:10.1621/nrs.03003. PMC 1402215. PMID 16604171. //www.pubmedcentral.nih.gov/articlerender.fcgi?tool=pmcentrez&artid=1402215. 
  6. Schaefer U, Schmeier S, Bajic VB (January 2011). "TcoF-DB: dragon database for human transcription co-factors and transcription factor interacting proteins". Nucleic Acids Res. 39 (Database issue): D106–10. DOI:10.1093/nar/gkq945. PMC 3013796. PMID 20965969. //www.pubmedcentral.nih.gov/articlerender.fcgi?tool=pmcentrez&artid=3013796. 

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]

  • MeSH name - Co-Repressor+Proteins [1]