Conversa Wikipedia:Caixas de usuario

Os contidos da páxina non están dispoñibles noutras linguas.
Na Galipedia, a Wikipedia en galego.

Non sei a orixe do texto desta páxina nin se foi froito dun consenso, dunha tradución ou unha opinión persoal do editor no seu momento. Pero está claro que a súa indefinición desagrada a máis de un galipedista e deu pé a situacións que raiaron a violencia (verbal). Por conseguinte, e ata que non lle deamos unha redacción consensuada e máis clariña, propoño eliminar esta parte:

  • "A política actual na Galipedia, mentres non se tome unha decisión definitiva, é que aquelas caixas que fan referencia a crenzas, opinións, afeccións, ideoloxía,... comprometen a neutralidade. A clasificación dos usuarios en categorías, condicións ideolóxicas e/ou vitais é unha demostrada orixe, dado o acontecido noutras wikipedias, de conflitos irreversibles, dá pé a prexuízos e crea divisións entre os colaboradores"

e substituílo, de ser necesario, cunha mención ás normas de conduta, nas que xa está dito case todo. Lembrade que, salvo erro meu, o argumento da neutralidade só se aplica ós artigos, expresamente, non ás páxinas de usuario. Saúdos, Pedro --Lameiro (conversa) 23:37, 16 xaneiro 2009 (UTC)

Eu estou completamente dacordo, pero creo que deberia deixarse claro a prohibición de publicar caixas de usuario que sexan ofensivas ou con vocabulario malsoante.--Carronada 00:13, 17 xaneiro 2009 (UTC)

  • Concordo con Lameiro, ademais tal como está expresado no texto esas caixas non están realmente prohibidas, tan só se di que poden comprometer a neutralidade, ademais o texto non está marcado co modelo de Modelo:PolíticasGalipedia que é cando se indica que un texto contén políticas e normas oficiais da Galipedia. Iso sen ter en conta que levar ó extremo non dar opinións podería levar a considerar que por exemplo a miña antiga páxina de usuario debería ser borrada (de feito borreina) porque eu daba unha opinión sobre a lingua galega (non renunciar a ela)--Biógrafo 13:00, 17 xaneiro 2009 (UTC)
Concordo coa base desta conversa e agradezolle a Lameiro. Non temos que esquecer que o punto de vista neutro concirne unicamente ao espazo enciclopédico e máis que as páxinas usuario están feitas para expresar a personalidade do usuario que o desexa. Penso que a cuestión que debemos abordar para mellorar esta páxina e facer del unha política é de definir as modalidades de expresión autorizadas. ElviraConversa comigo 13:18, 17 xaneiro 2009 (UTC)
  • Supoño que a cuestión está no que entendamos por neutralidade, pero primeiro cómpre defini-lo ámbito desa neutralidade. ¿Neutralidade da Galipedia (do proxecto wikipedia, en xeral) ou neutralidade dos usuarios? A neutralidade da Galipedia queda fóra de toda dúbida e cómpre salvagardala como ouro fino, mentres que a neutralidade de cada usuario só pode estar limitada por el mesmo (e o respecto ós demais).
  • Supoño, tamén, que as limitacións que queiramos marcar ás caixas de usuario se deberán aplicar igualmente ó texto ou imaxes contidas na súa páxina. Non tería sentido prohibir unha manifestación relixiosa, por poñer un exemplo, nunha caixa e permitila no texto.
  • A frase que propoño retirar fala de "crenzas, opinións, afeccións, ideoloxía,...". Supoño que o autor quería indicar crenzas relixiosas e ideoloxías políticas pero non podo entende-la mención a "opinións" e "afeccións"; tampouco entendo o que pode haber implícito nos putnos suspensivos. Semella que facer expresión pública destes conceptos prexudique a neutralidade (supoño que á neutralidade do proxecto) e que pode ser fonte de conflitos. ¿Por que? Se esas expresións simplementen pretenden describi-lo usuario ¿onde está o prexuízo? ¿En que afecta á neutralidade do proxecto que eu me confese, na miña páxina, crente ou ateo (crenzas relixiosas), que me guste o café ou o jazz (expreso así unha opinión), que sexa ecoloxista ou coleccionista de selos (expreso unha afección), ou mesmo que sexa do Bloque ou do PP (ideoloxía)? ¿A quen ofendo se un día fago unha afirmación así? ¿A Galipedia vai ser menos neutral se resulta que eu digo que son do Barça?
  • Canto ós puntos suspensivos: dicir que son agnóstico, vexetariano, pacifista, etc. ¿sería unha expresión de filosofía vital permitida ou entraría no mesmo saco cás outras opinións, prohibidas? ¿Podo dar a coñece-la miña profesión ou iso comprometería a neutralidade do proxecto: a ver se resulta que, como son veterinario, non podo escribir artigos sobre alimentos ou enfermidades do gando.
  • Cousa ben distinta sería incluír frses ou imaxes que implicasen unha crítica a quen pense o contrario ca min, e non quero poñer exemplos para non ferir a ninguén. Ou poñer mensaxes que expresen que a miña opción sexa mellor que outras. Ou simplemente palabras soeces, insultos ou desprezos a persoas ou colectivos. Claro que todo isto debería estar expresamente prohibido, se se cre que as "Normas de conduta" non son xa abondo explícitas.
  • Saúdos, Pedro --Lameiro (conversa) 16:05, 17 xaneiro 2009 (UTC)
Estou case na totalidade de acordo con Lameiro, mais creo que hai que diferenciar un matiz: non creo que sexa o mesmo expresar as túas inquedanzas políticas, relixiosas, etc. na túa páxina de usuario que facelo mediante caixas de usuario. Coido que é importante diferenciar, porque a creación de caixas faise para que as utilice quen queira e iso pode provocar que xente que non ía escribir nada na súa páxina sobre iso (por exemplo, o normal é non declararse antichavista na túa páxina de usuario, mais se hai unha caixa para iso pois igual a pos) acabe por poñer cen caixas para que quede bonito, e unha vez fanse caixas xa queda a caixa de pandora aberta e acabaríamos como na wiki hispanofalante na que se poden ollar entre outras caixas bastante ofensivas cara outras persoas doutras sensibilidades como poden ser estas (só son un exemplo): es:Usuario:Klausmeyer/Stop Socialismo, es:Usuario:Randroide/Usuario antimarxista, es:Usuario:Userbox/Usuario Antichavista, es:Usuario:Userbox/nacionalsindicalista, es:Usuario:Villeguillo/ Cristo rey de España, es:Usuario:Userbox/No independentista, es:Usuario:B1mbo/Usuario pena de muerte... Por iso coido que non hai que permiti-las caixas con información político-relixiosa e de cuestións que poidan ofender a alguén. Pódense acabar convertindo as páxinas de usuario en zonas onde cadaque´n estea encaixado nunha opinión, e provocar así malos rollos. Se alguén quere espresar inquedanzas políticas ou relixiosas (sempre sen ofender a ninguén) coido que pode escribilo ou amosalo se así o quere na súa páxina de usuario, mais non mediante a creación de caixas, que poden crear, como xa dixen, unha espiral certamente destrutiva da relación entre usuarios. Alberte Si, dígame? 16:26, 17 xaneiro 2009 (UTC)

Creando unha nova proposta[editar a fonte]

Veño de crear e editar unha páxina no meu espazo de nomes de usuario para ir recompilando o que aquí opinades (esquézome de algo?) e redactalo alí para máis adiante (dentro de pouco?) facer unha proposta. Agardo ser o máis obxectivo posible (iso non o podo dicir eu) para conseguir o consenso canto antes e non esquecer nada que poida dar lugar a outra conversa así sobre este tema. Convídovos a que me axudedes a mellorar o que eu fixen (seguro que ten moitas máis cousas que eu non contemplo), podedes editar tranquilamente a páxina. Saúdos! --Toliño Fala aquí comigo 18:53, 17 xaneiro 2009 (UTC)

Xa incluín as restricións no uso de categorías nas caixas de usuario. Botádelle un ollo e dicide como o vedes. Saúdos! --Toliño Fala aquí comigo 17:26, 22 xaneiro 2009 (UTC)
  • Outro tema que non ten que ver co que aquí debatemos son as axudas para crear estas caixas. Pódense traducir despois de ter clara a redacción destas limitacións. --Toliño Fala aquí comigo 19:09, 17 xaneiro 2009 (UTC)

Opinións sobre a nova proposta[editar a fonte]

Primeiro cuestóns técnicas:

  • "... pequenas mensaxes que poden axudar directa ou indirectamente á axuda colaborativa máis efectiva no proxecto": non se pode dicir "axudar... á axuda".
    • "... pequenas mensaxes que poden axudar directa ou indirectamente a unha colaboración máis efectiva no proxecto"
  • "...primeiro paso que constitúe a base para acadar a vida cívica en sociedade". Non sei que quere dicir iso de "vida cívica".
  • "... verbos negativos, que poden ser potencialmente divisivos". ¿Divisivos? Non debe nin existir esa palabra
    • "... verbos negativos, que poden ser potencialmente causa de división"
  • "...oracións pechadas que expresan cousas positivas e negativas". Preferiría "ideas" no canto de "cousas".
  • "Exprese o que fai, no canto do que non". Por coherencia coas frases anteriores: "...no canto do que non fai".

Saúdos, Pedro --Lameiro (conversa) 20:23, 17 xaneiro 2009 (UTC)

    • Isto xa foi solucionado. Grazas, ás veces un non ve algunhas das parvadas que escribe, outras veces outros ven mellor onde se pode mellorar... --Toliño Fala aquí comigo 20:51, 17 xaneiro 2009 (UTC)

E segundo, cuestións de fondo:

  • O punto 2º das restricións ("A Wikipedia non é lugar para os eloxios, a propaganda, a promoción ou os apoios a calquera tipo de opinión, tanto comercial, como política ou relixiosa") ¿aplícase á Wikipedia incluíndo as páxinas de usuario ou só ós artigos? Entendo que a wikipedia (artigos e páxinas) non sexa "lugar para ... a propaganda, a promoción ... a calquera tipo de opinión, tanto comercial, como política ou relixiosa". É dicir: prohíbase a propaganda, o proselitismo, o eloxio e o apoio de opinións comerciais, políticas ou relixiosas, pero ¿tamén "a calquera tipo de opinión"? ¿tamén nas páxinas de usuario? Quizais semelle excesivamente restritivo.
  • A proba do algodón para esta redacción sería facérmonos esta pregunta: con esta política ¿pódense dicir ou facer –nas páxinas de usuario, na caixa ou no texto- cousas como estas?:
    • escribir “este usuario é crente” ou “este usuario é liberal” (expreso o que son, non o que non son, nin pido a ninguén que siga os meus pasos)
    • escribir: “eu son ecoloxista”
    • colocar unha bandeira de Galicia, colocar unha bandeira “roja y gualda” (¿sería iso promoción do nacionalismo ou do centralismo?)
    • colocar unha imaxe relixiosa, colocar un cruceiro (¿sería entendido como proselitismo relixioso?)
    • transcribir unha cita como a que teño eu na miña páxina: Se eu fixen tal mundo ... ¡que o demo me leve! (Deus, en boca de Curros)

Respondendo á miña pregunta, eu creo que tal como o temos redactado non se poderían dicir nin facer estas cousas. Ó mellor eu só vexo fantasmas e deba presumir máis boa fe. Pero ide pensando. Encantoume a frase case final "Exprese quen é, en logar do que non é". Saúdos, Pedro --Lameiro (conversa) 20:44, 17 xaneiro 2009 (UTC)

      • Fixen un cambio na redacción; creo que cambia o sentido da frase. A ver se che parece mellor. --Toliño Fala aquí comigo 21:07, 17 xaneiro 2009 (UTC)
        • ¡Que paciencia tes que ter comigo, Toliño! Si, paréceme mellor porque delimita lo inadmisible ó que, efectivamente, debería ser inadmisible. Acabo de darme unha volta pola lista de páxinas de usuario (sección crenzas) da wiki española: ¡para alucinar por colores! Visto o visto, non sei de que nos queixamos nós. Saúdos, Pedro --Lameiro (conversa) 21:15, 17 xaneiro 2009 (UTC)
Toliño estas a fazer un traballo !!!! Lameiro, debese distinguir as politicas das userbox/caixas de usuario e as das páxinas de usuario. Ainda non temos Wikipedia:Páxina de usuario, pero xa se fara. Claro que nacen das mesmes nais Normas de conduta etc e entran no mesmo eido da convivencia entre os colaboradores dun proxeto. Por exemplo ninguén lle pode impidir a un usuario de escribir na súa páxina de conversa que é católico e/ou comunista, que il pensa que fulano ou mangano vai salvar ao mundo, nin lle podes impidir a un usuario de subir a súa páxina unha foto admitida en commons. O tema que sexa para as caixas en particular, ou a paxina en xeral, abarca o relacional e xa estamos cunha problematica delicada. Calquer pode subir unha das imaxes do Tres de maio, poís no caso do Tres de maio houbo casos na Galipedia que o momento que foron subudas as imaxes podianse dudar se eran unha expressión da creenza, gustos, valores dos usuarios ou se eran verbas dirixidas a outros usuarios. Para mín esta hai o máis importante da politica. Se un usuario ofendese por ver unha desas caixas na páxina doutro usuario, direi que ten que aprender a convivir. Outra cousa é que un usuario ofendase por algo na páxina doutro usuario que é un ataque persoal.
Voltando ao traballo de Toliño, ainda non entendin todo, pero por min andamos mui ben. SaúdosElviraConversa comigo 22:37, 17 xaneiro 2009 (UTC)

Outra proposta[editar a fonte]

O primeiro que quero facer é darlle os meus parabéns a Toliño pola súa proposta. Gran traballo. Porén, pediría un pouco de calma e tranquilidade. Como a treboada xa a sufrimos, non temos por que ter présa por amarrar o pararraios: actuemos de vagar, consultemos fontes, e fagamos popostas sólidas máis ala da inmediatez do momento.

Estiven mirando nas últimas horas algunhas páxinas de en.wp, así como a información que nos transmitiu a algúns de nós Elvire sobre as votacións en fr.wp. E cando me puxen a tomar notas e a corrixir cousas, saíume unha nova redacción, completamente distinta á de Toliño. Con iso non quero dicir que estea en desacordo co que fixo el: en absoluto. Pero tentei organizar algo mellor as cousas e incorporar algo da visión positiva de Lameiro. Ademais, partín dun sitio distinto: en vez de facer unha páxina sobre caixas de usuario, fagamos unha sobre páxina de usuario. Póñoa en tipo de letra pequeno, para non molestar a lectura global.

Páxina de usuario[editar a fonte]

A wikipedia é un proxecto construtivo no que poden participar (e sería óptimo que o fixesen) individuos de todas as ideoloxías políticas, crenzas, coñecementos e opinións. Pero como xa quedou dito en diversas ocasións, a wikipedia non é un foro de debate, nin un blog, nin unha web persoal.

A túa páxina de usuario é un espazo que a wikipedia che cede xenerosamente, e sobre o que só ti tes control. Nel podes tomar notas, podes presentarte, podes engadir algunhas fotos túas, publicar pensamentos xenéricos sobre o que supón a wikipedia, etc. O seu obxectivo é mellorar a empatía cos demais usuarios e facilitar as relacións.

Pero, ao mesmo tempo, é un espazo que pertence á wikipedia, e que polo tanto ten que aterse a unhas regras de convivencia e neutralidade. Pensa que os demais usuarios teñen tamén a súa forma de pensar, que é tan correcta como a túa. Así pois:

  • Evita entrar en controversias innecesarias e non busques a provocación a través da túa páxina de usuario ou do teu nome de usuario.
  • Se queres expresar un pensamento, faino en positivo, e nunca á contra.
  • Evita as palabras malsoantes ou as expresións que os demais poden crer molestas.
  • Se tes unha desputa con outro usuario por unha diverxencia na edición, o peor que podes facer é trasladar ese problema ao resto de páxinas, entre elas a de usuario. A wikipedia xa ten outras formas para conseguir consensos, e non as páxinas onde só podes opinar ti.
  • Evita as bandeiras ou símbolos que poidan xerar múltiples interpretacións e crear controversia.

Restricións expresas[editar a fonte]

  • Non se deben incluír nas páxinas de usuario informacións ou proclamas racistas, sectarias, homofóbicas ou machistas, ou que inciten o odio e a discriminación en calquera das súas formas. O seu uso levaría a retirada inmediata do contido (ben por parte do propio usuario ou ben por parte dun administrador), e probablemente ao bloqueo temporal.
  • Como a Wikipedia non é un espazo comecial, do mesmo xeito non se deben incluír anuncios, promocións ou publicidades, sexan comerciais, políticas ou relixiosas. Hai moitos sitios para facer proselitismo fóra da wikipedia. Do mesmo xeito, se isto sucedese debería ser subsanado canto antes e podería rematar nun bloqueo do usuario.
  • Os ataques persoais ou as condutas de acoso, sexan directas ou paródicas, serán rapidamente desestimadas, e poderán rematar nun bloqueo do usuario. Non as fagas tampouco na túa páxina de usuario.

As caixas de usuario[editar a fonte]

Unha etiqueta ou caixa de usuario (en inglés: userbox) é unha pequena caixa de cores deseñada só para aparecer na páxina de usuario dun wikipedista como aviso comunicativo sobre el. Deste xeito, os usuarios poden engadir pequenas mensaxes para axudar directa ou indirectamente a unha colaboración máis efectiva no proxecto.

As caixas de usuario foron creadas como unha adaptación das caixas de información Babel, usadas para informar acerca dos coñecementos lingüísticos dos usuarios e faclitar a interacción dos colaboradores.

Se inzas a túa páxina de caixas de usuario, poucas delas poderán ser realmente interesantes e facilitar a empatía. É probable que moitas delas sexan puramente puntuais, conxunturais, irrelevantes ou busquen facer bromas. Economiza o espazo. O abuso da xenerosidade da wikipedia está altamente desaconsellado.

Lista de caixas de usuario[editar a fonte]

Para unha lista coas caixas de usuario que existen actualmente na Galipedia, véxase: Wikipedia:Lista de Caixas de usuario.

Sinaturas[editar a fonte]

Todos estes principios son aplicables tamén ás sinaturas, para as que ademais se desenvolveu unha noma específica.

Toma de control[editar a fonte]

Aínda que só ti tes en principio control sobre a túa páxina de usuario, o ataque aos principios xenéricos da wikipedia pode facer que, da maneira máis dialogante e menos intrusiva posible, os administradores editen os seus contidos, retirando aqueles aspectos controvertidos.

--Xabier Cid Conversa 23:08, 17 xaneiro 2009 (UTC)

Moi boa proposta Xabier. Míroa totalmente compatible coa que desenvolveu Toliño xunto con Lameiro, asíq ue a túa pode quedar como unhas normas e consellos para a páxina de usuario, e a que escribiu Toliño como específica para as caixas de usuario. Do texto das normas da páxina de usuario mudaría tan só unha cousa, e é o último parágrafo da sección das caixas de usuario que di: Se inzas a túa páxina de caixas de usuario, poucas delas poderán ser realmente interesantes e facilitar a empatía. É probable que moitas delas sexan puramente puntuais, conxunturais, irrelevantes ou busquen facer bromas. Economiza o espazo. O abuso da xenerosidade da wikipedia está altamente desaconsellado. Eu eliminaría a partir de É probable.... e logo engadiría: A política sobre as caixas de usuario está desenvolvida en Wikipedia:Caixas de usuario. Máis nada, parabéns a Toliño, Lameiro e mais Xabier polo seu bo traballo. Un saúdo. Alberte Si, dígame? 23:26, 17 xaneiro 2009 (UTC)

A min paréceme perfecta esta proposta, o único que non comprendo totalmente é: "Evita as bandeiras ou símbolos que poidan xerar múltiples interpretacións e crear controversia." a que clase de bandeiras e símbolos nos referimos? Saudos--Carronada 00:51, 18 xaneiro 2009 (UTC)

Ola, Carronada. :) Aos que poidan xerar controversia. Póñoche dous exemplos opostos:

  1. Un usuario coloca a bandeira de Polonia na súa páxina de usuario porque está a traballar en artigos da historia de Polonia.
  2. Un usuario, despois de ter unha violenta discusión con outro sobre o artigo matrimonio homosexual, coloca unha bandeira de Polonia.

Debemos pensar por que razón pomos os símbolos e bandeiras, e se o facemos para xerar empatía ou para atacar ou intimidar os demais. E tamén somos conscientes, por outra parte, que unha bandeira da Cruz Vermella é en xeral menos controvertida cá de Hamás. Non creo que o problema estea no símbolo, senón nos obxectivos. Con todo, en xeral, unha bandeira, un símbolo relixioso ou político, son elementos cos que é sinxelo ferir susceptibilidades, e creo que na medida do posible deberiamos evitalos.--Xabier Cid Conversa 08:39, 18 xaneiro 2009 (UTC)

Moi ben, captado, gracias--Carronada 11:55, 18 xaneiro 2009 (UTC)

  • Totalmente de acordo en incluír este texto en Wikipedia:Páxina de usuario. Só teño un par de observacións:
  1. "Non se deben incluír nas páxinas de usuario informacións ou proclamas racistas, sectarias, homofóbicas ou machistas, ou que inciten o odio e a discriminación en calquera das súas formas." --> Incluímos tamén os comentarios feministas? Así como están os machistas...
  2. Na sección "Toma de control" eu ampliaría o texto cunha aclaración, para non sermos tan bruscos. Penso que o primeiro que se debe facer é pedirlle amablemente ao usuario X que incumpra a regra que retire o texto, imaxe ou o que sexa. Se se nega, un administrador terá que retiralo.
Son soamente dúas cousas pequerrechas, case sen importancia. Parabéns polo resto. Saúdos! --Toliño Fala aquí comigo 18:47, 19 xaneiro 2009 (UTC)
Ben, será mellor dicir sexistas. Pero en todo caso, aínda que as dúas palabras acaben en -ismo, o machismo non é o equivalente masculino do feminismo, igual que o igualitarismo non o é do racismo. :)
Con respecto ao da toma de control, por iso puxen "da maneira máis dialogante e menos intrusiva posible". Así creo que se deixa unha pouca de marxe para que se actúe en función dos casos e das reincidencias. Aínda que ese é o obxectivo, ti imaxina que en caso de reincidencias continuadas os administradores teñen que sistematicamente pedir primeiro a retirada e logo, despois de que o usuario pasa un tempo prudencial por determinar, actuar. --Xabier Cid Conversa 21:26, 20 xaneiro 2009 (UTC)


Coido que se debería explicar nalgún lado como se crean estas caixas, e na lista de caixas de usuario deberían estar todas as caixas que existen, non so as "oficiais". Saudos e gracias.--Carronada 16:29, 31 xaneiro 2009 (UTC)

Traído desde «https://gl.wikipedia.org/w/index.php?title=Conversa_Wikipedia:Caixas_de_usuario&oldid=6091108»