Cervexa branca

Na Galipedia, a Wikipedia en galego.
Cervexa de trigo alemá, nun vaso típico de Weissbier.

A cervexa branca ou cervexa de trigo é unha cervexa que é elaborada cunha cantidade significativa de trigo. Estas cervexas a miúdo conteñen unha proporción apreciábel de malte de cebada. A miúdo son de alta fermentación, e en Alemaña teñen que selo por lei[1]. O seu aroma varía considerabelmente, dependendo de cada estilo.

Variedades[editar | editar a fonte]

As dúas variedades máis comúns son as witbieren baseadas na tradición belga de empregar aromatizantes como o coandro ou a casca da laranxa[2], e as Weißbieren baseadas na tradición alemá de mesturar canto menos 50% de trigo con malte de cebada para facer unha ale de cor clara[3]. Tanto a witbier belga como a Weißbier alemá reciben o nome de "cervexas brancas" porque historicamente teñen sido sempre máis pálidas que outros tipos de cervexa.

As cervexas brancas belgas a miúdo teñen especias como o coandro ou laranxa ácida engadidas, dándolles un lixeiro aroma a froita.

As cervexas brancas alemás son nomeadas Weizen ("trigo") nas rexións do oeste (Baden-Württemberg) e do norte, e Weißbier ou Weiße ("cervexa branca" ou "branca") en Baviera. Hefeweizen ("hefe" é o alemán para lévedo) é o nome para as cervexas de trigo sen filtrar, namentres que Kristallweizen ("kristall" é o alemán para cristal) é a mesma cervexa filtrada.

Weissbier[editar | editar a fonte]

Artigo principal: Weissbier.

A Weißbier ou Weissbier (en galego: cervexa branca), tamén chamada Hefeweizen, Weizenbier ou Hefeweissbier , é un tipo de cervexa feita de malte de trigo, malte de cebada, lúpulo e lévedo. Normalmente a Weissbier ten unha gradación alcólica de entre 5 % e 6 %. A bebida é principalmente consumida no sur de Alemaña nos estados de Baviera e Baden-Württemberg, porén tamén é bastante popular noutras rexións do país, e noutros moitos países, como en Austria, en Bélxica e nos Estados Unidos de América. Algúns exemplos de produtores de Weissbieren son, por exemplo, Paulaner, Boston Beer Company, Erdinger, Schneider Weisse ou Franziskaner.

Witbier[editar | editar a fonte]

Artigo principal: Witbier.

A witbier (en francés: bière blanche), ou simplemente Witte é unha cervexa de alta fermentación de cebada e trigo elaborada principalmente en Bélxica, malia que ten tamén presenza nos Países Baixos e noutros lados. Colle o seu nome por mor do lévedo en suspensión e das proteínas de trigo que provocan que a cervexa teña un ton branco cando está fría.

Variedades agres[editar | editar a fonte]

Botellas diversas de Lambic Kriek, ou Lambic de cereixa.
Artigos principais: Lambic, Berliner Weisse e Gose.

Unha variedade menos espallada da cervexa de trigo é a Berliner Weisse (Berlinesa Branca), que ten menos alcol (do 2.5% ao 3%) e é bastante ácida. Os seus seareiros a miúdo engádenlle xaropes doces de limón, framboesa ou aspérula.

A cervexa Gose de Leizpig é semellante á pero un pouco máis forte, con preto do 4% de alcol. Entre os seus ingredientes están o coandro e a sal, e polo tanto non se adapta á Reinheitsgebot. Tanto a Gose como a Berliner Weisse adquiren a súa acidez por medio do uso da bacterias de ácido láctico na fermentación xunto co lévedo.

A Lambic belga tamén está feita con trigo e cebada, pero difire da witbier no seu lévedo. A Lambic é de fermentación espontánea.

Servindo a cervexa de trigo[editar | editar a fonte]

Vaso típico de Berliner Weisse.

A cervexa branca ao estilo bávaro sérvese usualmente en vasos dunha forma determinada de 500 ml. En Bélxica, a witbier sérvese normalmente en vasos de 25 cl, pero sen unha forma estándar. A Berliner Weisse sérvese nun schooner.

A Kristallweizen (especialmente en Austria) e os estilos americanos de cervexa de trigo son a miúdo servidos cunha choucha de limón ou laranxa no vaso; isto xeralmente non se ve ben en Baviera. [1]

No norte de Baviera, é común engadir un grao de arroz ás Kristallweizen, que provoca un efecto agradábel de burbullas e que resulta nunha escuma de máis duración[4].

Algo común nos pubs de Baviera é a Cola-Weizen, mestura de refresco de cola e Weizenbier. Tamén é popular en diferentes partes de Alemaña a Bananenweizen (cervexa de trigo con néctar de banana).

Notas e referencias[editar | editar a fonte]

  1. 1,0 1,1 Eric Warner, German Wheat Beer. Boulder, CO: Brewers Publications, 1992. ISBN 978-0-937381-34-2
  2. "The On-Line Guide to Belgian Beer - Beer Styles". www.belgianstyle.com. http://www.belgianstyle.com/mmguide/style/white.html. Consultado o 2008-06-20.
  3. "Weissbier". www.germanbeerinstitute.com. http://www.germanbeerinstitute.com/weissbier.html. Consultado o 2008-06-20.
  4. Weizenbier or wheat beer

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]